Na Corsou, Giselle Mc William a bira lider nobo di partido politico MAN

WILLEMSTAD.- E 52 aniversario di partido MAN ta bai den historia komo unu úniko, esei pa motibu ku n’e okashon aki e partido a konosé su promé lider polítiko femenino den persona di sra. Giselle Mc William. For di 1971 ku e partido a ser fundá dor di sr. Don Martina i otronan e organisashon a konosé hende hòmber na timon. Hopi ta e hende muhénan ku a asumí puestonan prominente den Konseho Insular, den Parlamento i komo mandatario, pero pa promé biaha un hende muhé realmente ta na timon di e partido blou.

El a trese dilanti ku, awe komo un humilde sirbidó e ta sinti su mes inmensamente privilegiá i honrá di por bai liderá un partido prestigioso manera Movementu Alsa Nashon, un partido ku su fundeshi i ideologia ta basá riba dignidat humano, igualdat, hustisia sosial i solidaridat. Un ideologia ku e ta identifiká su mes kuné fuertemente, no pasobra e ta e ideologia dje partido, sino pa motibu ku esaki ta basá riba e edukashon ku el a haña na kas.

Anda di e fundeshi aki huntu ku un kurason habrí i komo su kompas, e lo sigui sirbi pais i pueblo i partido ku integridat, karakter, determinashon, balentia i pashon pa traha i krea un Kòrsou ku nos tur ta stima i ta soña. Liderazgo di partido MAN for di su persona ta enfoká riba empatia i kombibensia, un direkshon polítiko ku e ideologia komo fundeshi pa fortifiká e aliansa, laso mas fuerte ku pueblo, organisashonnan i paisnan den region i Reino Hulandes, ku e meta pa bienestar di Kòrsou basá riba solidaridat i oportunidat pa un i tur. Partido MAN ta fungi komo é instrumento pa un futuro ku perspektiva, ku rèspèt pa nos grandinan, nos muchanan, pa hende muhé i basá riba igualdat, pero tambe rèspèt pa nos animalnan i nos medioambiente. “Lo mi hasi e trabou ku hopi pashon i determinashon”, asina el a deklará.

Segun sra. Mc William, si vishon ta pa yega na un nivel di enseñansa ku ta duna tur mucha e oportunidat pa desaroyá nan máksimo potensial sin ningun barera. Un desaroyo sosial ku realmente ta duna sosten na esnan débil den komunidat, unda solidaridat pa otro ta prevalesé ku enfoke riba personanan desabilitá di un manera òf otro. Un kuido médiko ku mester keda aksesibel, di kalidat i ku enfoke riba prevenshon. NOTA: E texto ta scirbi den Papiamento fonetico di Corsou.