Van Susteren na Noticiacla: Ta Ministerio Publico a nenga di papia cu Beth Holloway!

WASHINGTON – ‘Nan a nenga di entrevist’e”, e periodista Mericano Greta van Susteren a bisa den un reaccion cortico na Noticiacla dialuna riba e noticia di Ministerio Publico, cu hende lo a estafa Van Susteren riba e caso di desaparicion di Natalee Holloway. Den fin di siman OM a informa mes a informa van Susteren riba esaki. “(Ta) Beth Holloway a pidi nan, via mi, pa entrevist’e (Beth:red) pasobra e tin informacion pa suministra na nan” van Susteren a bisa Noticiacla. “E la te hasta ofrece pa bay cerca nan (OM:red). Nan a nenga!” e periodista a sigui bisa. “Con bo no kier entrevista e testigo principal?” van Susteren a sigui puntra. Segun van Susteren, e supuesto investigacion haci pa OM y e otro departamentonan, ta un farse. Te aki e reaccion di e periodista Mericano na Noticiacla.

VAN SUSTEREN ESTAFA

Manera cu e portal aki a informa awe den un otro raportahe, Ministerio Public a raporta cu periodista Mericano Greta Van Susteren a bira victima di estafa y manipulacion di probablemente personanan for di Sur-America cu kendenan e tabatin contacto y kendenan a gañe cu informacion falso, en cambio pa pago den e caso di Natalee Holloway. Asina Ministerio Publico a bisa den fin di siman riba e caso cu a sosode for di 2005 y ainda no tin solucion. Manera ta conoci, Natalee Holloway a desaparece na Aruba despues di un anochi di salimento riba 30 di mei 2005. Te dia di awe e desaparicion di Natalee tin su impacto.

REACCION AWE DI MINISTERIO PUBLICO

Ora cu Noticiacla a acerca Ministerio Publico (OM) pa e reaccion di van Susteren riba su reaccion awe, Ministerio Publico a sigura e portal aki cu nan haci investigacion di ‘aanwijzingnan di señora Van Susteren’ cu posiblemente por a hiba na solucion di e vermissing di Natalee. “Señora Holloway no ta un testigo den esey” e vocero Ann Angela a sigura e portal aki. “For di e investigacion aki a resulta cu e aanwijzingen ta falso y dus no a hiba na solucion di e vermissing”, Angela a finalisa bisando. Pa loke ta e acusacion di van Susteren na OM cu e investigacion ta un farse, e reaccion tabata mas simple: Esey ta pa cuenta di van Susteren.