CMB ta continua aporta na deporte: Division di S.V. Estrella Infantil patrocina pa CMB

ORANJESTAD - Tabatin hopi factor contra cual tabata haci casi imposibel pa sigui cu e lesnan di Judo. E tabata mustra casi imposibel pa continua cu e deporte aki den e bario di Madiki, pero e esfuerso y determinacion pa cambia e situacion a haci cu awendia nos ta cla pa habri un centro di Arte Marcial - BUDO HALL - danki particularmente na un persona.  Sr. Flavio Fayneyte tawatin un mision y vision su dilanti esta di trece bek e deporte cu ta na su curason. Cu hopi esfuerso y empeño  el a logra di construi tres edificio  pa arte Marcial. Tres edificio di cual uno a bin cla: esta e edificio pa practica Judo. Danki na algun sponser, ayudo di amigonan den forma di man na obra, conoci y amigo cu awendia e edificio ta cla. Den luna di april venidero e lesnan ta cuminsa.  cu gruponan pa mucha y mas despues pa hende grandi.

ORANJESTAD - Federacion di Ahedres di Aruba (FAA) a organisa nan Copa Himno y Bandera 2023 na nan cede na Royal Plaza recientemente. Un torneo segun FAA cu tabata riba un nivel hopi halto, cu a conta cu un total di 42 participante, 24 hubenil y 18 den categoria Open.

KIGALI – Despues di e edicion di mas cortico di Copa Mundial di Futbol di e siglo aki (aña pasa), ta sigui esun di mas largo na 2026. Por lo menos 48 pais lo debate na Merca, Mexico y Canada pa e copa. E cambio a keda anuncia durane e congreso di FIFA den e capital Ruandes Kigali e siman aki. Un total di 16 grupo di tres mester a bin, pero a cambia esaki pa 12 grupo di 4 pais unda cu e miho dos di cada grupo plus 8 di e mihor  number 3 ta sigui. Y esaki den combinacion cu un extra rond di knock out. Esey ta nifica cu lo hunga 104 wega reparti riba 40 dia, esta un luna y 10 dia, envez di un luna. Mientrastanto diahuebs awor lo re-eligi e actual presidente Gianni Infantino. 

ORANJESTAD – E delegacion di Aruba a bolbe bek cu 12 medaya durante Weganan Interinsular na Boneiro. Manera ta conoci, durante fin di siman, a tuma apertura di Weganan Interinsular na isla di Boneiro. Despues di 7 aña e torneo escolar ta bek. E meta di Weganan Interinsular ta pa stimula union y competencia cu sigur ta importante pa desaroyo di nos hobennan. Aruba, Boneiro y Curaçao a participa den e toreno escolar. Presidente di Parlamento, mr. Edgard Vrolijk a representa Minister di Deporte Endy Croes na e apertura di Weganan Interinsular 2023. Un ceremonia di apertura bunita y colorido yena di energia y positivismo. Delegacion di Aruba a biaha cu 16 atleta di cual 8 a participa den e disciplina di ahedres y 8 a competi den e deporte di dam. E hobennan a pone Aruba su nomber briya den e toreno escolar. Delegacion di Aruba a logra un total di 12 medaya. Den e disciplina di dam Xyon Jacobs a logra conkista medaya di oro pa Aruba. Weganan Interinsular ta continua dia 21 di maart na Curaçao den e disciplina di atletismo y trefbal. Dianan 21, 22 y 23 di april, Aruba ta cede di Weganan Interinsular 2023, unda ta organisa e competencia den e disciplina di volleyball y futbol. Minister Endy Croes a felicita e  atletanan cu nan excelente prestacion na Weganan Interinsular 2023 y alabes a gradici IbiSA, coach y mayornan pa sostene nan yiu den nan deporte faborito. E delegacion a bolbe Aruba diadomingo atardi unda cu nan a keda ricibi pa e mandatario di deporte na aeropuerto.

ORANJESTAD – Den fin di siman e presidente di Comitee Olimpico Internacional Thomas Bach a inaugura e oficina di Comite Olimpico di Aruba hunto cu Presidente di Panam Sports, Neven Ilic y e Comite di Ehecutivonan y cu demostracion di nos atletanan local den e Festival di Deporte. Manera a wordo bisa na diferente ocasion, un soño di hopi a bira un realidad  . E mainta a habri cu un demostracion di 9 deporte rond di henter e area di e oficina di COA. Un cantidad grandi personanan den e mundo di deporte a bini hunto na e ocasion aki como tambe nos dignitarionan. Na yegada di Presidente di ICO, Thomas Bach, Presidente di Panam Sports, Neven Ilic y e Comite di Ehecutivonan, nos atleta y coach nan a haya e oportunidad di intercambia palabra cu Thomas Bach. Mas cu claro tabata tin un momento di potret cu sr. Bach.

KRALENDIJK - Weganan Interinsular na Boneiro a cuminsa cu un bon animo den e muchanan. Esnan presente a haya un bon bini di e organisacion di Indebon como tambe di e federacionnan di dammen y schaken. E coachnan e combersa y tene e muchanan calmo prome cu e torneo cu nan a bin p’e.