ORANJESTAD - Prome, durante y despues di Parada di Mucha Oranjestad, nos unidad motorisa di Polis miho conoci como “Motor Unit” tabata activo tur skina paden y pafo di Parada. For di comienso te cu final unidad motorisa a para y a controla 148 auto na diferente sitio rond di Aruba.
Durante e controlnan aki por a tuma nota cu mayoria chauffeur tabata responsabel y nan tabata tin un amigo responsabel tras di stuur. Di e 148 auto controla a detene solamente 3 persona pa maneha nan auto bou influencia di alcohol.
KPA ta sumamente orguyoso cu e mensahe di concientisacion a yega na mayoria automobilistanan na Aruba. Hopi chauffeur responsabel tras di stuur y nos tin cu duna nos comunidad un DANKI pa esey!
Na final di dia nos por conta cu tabata tin trafico sigur despues di parada y cu mayoria famia por a yega cas sano y salvo!
SAVANETA – Dialuna marduga, riba dia di Himno y Bandera, Aruba a conoce su di 2 morto di trafico pa 2024. Tabata dialuna marduga despues di 4or cu un accidente hopi grave a tuma lugar riba caminda grandi di San Nicolas pa Playa na altura di Savaneta. Un motorciclista a dal frontal contra un auto Nissan march, ora cu e motorciclista tabata bin di pabou. E impacto tabata fuerte lagando e brommer destrui y e manehador, basta leu riba. Informacion ricibi ta mustra cu e chauffeur di e march lo a pasa un truck, y topa frontal cu e motociclista, cu e consecuencia conoci. Informacion cu Noticiacla a ricibi, ta cu e motorciclista cu ta esun cu a perde su bida tabata Maximilian Thomas Hernandez Pinedo (20) , naci na Aruba . Noticiacla ta manda palabra di condolencia na famianan di e fayecido.
MACUARIMA - Diasabra awor dia 16 di maart 2024, polis di districto di San Nicolas ta invita tur persona cu a haci nan peticion pa temporada di campamento pariba di brug, cu lo mustranan e sitio cu nan lo campa. Lo cuminsa 9’or di mainta den e area di Santana di Cacho, despues pa Baby Beach, Rodgers Beach y por ultimo pa e area di Zwat Mangel y Grapefield. Pa 1’or di merdia lo sigui na Savaneta y Pos Chiquito.
MACUARIMA – Cuerpo policial di Aruba a ricibi un flota di 34 auto nobo nobo marca Ford diamars. E agencia cu a percura pa esaki ta R. E Yrausquin & Sons. Nan ta bay awor di e marca Isuzu pa Ford, specificamente e modelo Everest y Ranger. A haci un cambio radical for di e zwaailicht blauw y oraño pa blauw y cora. E cambio aki tabata ta pa miho visibilidad y seguridad pa e agentenan policial pero tambe pa comunidad. Tambe lo tin sonido di sirena diferente compara cu antes pa mihor sonido.