ORANJESTAD - Dia 30 di januari 2023 algun miembro di Conseho di Aruban Warriors a entrega unDeclaracion cu un lista di 15 demanda na Secretario di Estado sra. Alexandra van Huffelen. Segun e organisacion (MIA), parti di pueblo Arubano no ta sigui noticia riba medionan social p’esey nos ta haci uzo di prensa skirbi. Y segun representante di e grupo, Helena Croes, Telearuba lo tabatin ordo pa no cubri e noticia ni pa filma nan accion. Segun Croes, noticia di nan manifestacion a plama riba full Hulanda y tambe internacional. “Nos aliadonan indigena a publica e noticia riba nan paginanan di facebook y tiktok” Croes a sigui bisa.
VNO
Aña pasa December (5 di December 2022) nan a entrega nan Declaracion di Pueblo indigena Arubano na VNO. Y awor cu bishita di famia real Hulandes nos a haci uzo di nan bishita na Sanicolas pa nos entrega nos Declaracion. “Nos ta cuminsa nos Declaracion basando nos riba tur tratado cu Reino Hulandes a firma. Esakinan ta tratadonan den cual derechonan Indigena ta hancra. Despues nos ta relata den corto historia di nos antepasadonan Caquetio bou colonisacion Hulandes desde 1636. Den e parti ey nos ta pone informacion di e censonan desde 1715 y cita parti di investigacion di archivo di historiadornan renombra manera dr. Adi Martis, studio cientifico di nos DNA di dr. Oswald Wever y conocemento di arkeologo Raymundo Dijkhoff. Na final nos ta bisa explicitamente cu nos no kier disculpa ni di gobierno Hulandes ni di Rey” Croes a sigui bisa.
E EXIGENCIANAN
Y segun Croes, nan a pone 15 exigencia manera entre otro: 1. Compensacion pa henter Aruba 180 km2, na 250 euro pa m2 cu a wordo horta foi nos. 2. Compensacion pa 1.180 ton di oro cu a wordo saca bou supervision Hulandes na balor actual di 56.000 dollar pa kilo Locual ta 66 miyon dollar. 3. Nos ta exigi cu tur tera cu no ta duna den erfpacht y/of huurgrond wordo registra riba nomber di nos tribu. 4. Un beurs di 100 mil euro pa cada studiante cu ta pertenece na nos tribu Caquetio. 5. Paro inmediato di contruccion di hotel, condominio, airbnb y supermercado Chines. 6. Derecho riba un parti di ganashi di tur negoshi multinacional riba nos tera manera hotelnan cu nan casino.” Y un exigencia importante ta pa Hulanda duna validez na e tratado riba derechonan indigena y incorpora esaki den nos constitucion” Croes a continua bisando.
MAS EXIGENCIA
Segun Croes, e no ta keda ey pero cu tin mas exigencia. “Tur nos exigencianan lo beneficia solamente miembronan di nos tribu. Criterio pa bira miembro ta lo siguiente: e persona cu kier bira miembro di tribu mester por prueba cu stamboom di ANA cu e tin un matriarca (stammoeder) y/of un patriarca (stamvader) naci na Aruba den siglo 18 y/of siglo 19. Mester compronde bon cu miles di habitante cu no tin nan liña di sanger akinan por bay biba bek na nan pais di origen, pero pa nos, indigena Arubano, ta pais Aruba ta nos cas unda nos tin conexion spiritual y di sanger. ARUBA ta tera sagrado di nos antepasadonan Caquetio. Nos mester proteh’e” Croes a finalisa bisando. Potret ta screenshot di raportahe for di NOS.
ORANJESTAD - Desde 2019 131 a incorpora un Conseho Hubenil den nan organisacion. E Conseho Hubenil di 131 su tarea ta pa primeramente duna conseho solicita y no solicita na e organisacion. Tambe nan ta duna conseho ariba proyectonan di 131, prome cu nan ser implementa. E Conseho Hubenil di 131 ta duna e organisacion un bista cu precision di kiko ta pasando bao di mucha y hoben y pakiko.
ORANJESTAD - Den cuadro di transparencia y informacion nos di Horacio Oduber Hospital ta comparti cu boso e cifranan pa loke ta luna di februari 2024. Como Hospital ta importante y alabes interesante pa duna comunidad di Aruba un indicacion di cuanto pashent Hospital ta atende mensualmente, cuanto operacion ta tuma luga, pero tambe cuanto baby a nace durante luna, cuanto pashent a regresa cas despues di admision y mas.
ORANJESTAD – Faltando 4 luna pa e eleccion presidencial di Venezuela, un grupo di Venezolano residencia na Aruba a expresa su preocupacion y frustracion ‘pa e ausencia di material electoral den Consulado (di Venezuela) na Oranjestad. Asina e portal di Venezuela LaPatilla.com ta raporta. Segun e portal, un grupo di Venezolano a presenta nan disgusto na e sede di Consulado. Mes momento nan a informa nan mes di e rekisitonan nobo cu ciudadanonan Venezolano residencia na Aruba mester cumpli cu ne pa por eherce nan derecho di voto: Carda di Censo, y cedula di identidad di Aruba, y pasaporte y cedula Venezolano vigente.
ORANJESTAD - Aruba Tourism Authority (A.T.A.) a firma acuerdo di un aña cu Fundacion Parke Nacional Aruba (FPNA). Cu e acuerdo strategico aki, A.T.A. ta reafirma su compromiso pa sigui traha di cerca cu FPNA como un sosten mutuo pa cu esfuersonan continuo den proteccion y preservacion di nos naturalesa..