ORANJESTAD – Casi na final di 2022 a celebra un ocasion historico ora a firma un memorandum (MOU) entre e islanan di Caribe Hulandes, Hulanda, e seis aeropuertonan di Caribe Hulandes y Dutch Caribbean Association of Airports. E MOU aki a formalisa un compromiso di e asociacion p’asina explora y establece un conexion aereo accesibel, eficiente y sostenibel entre Corsou, Aruba, St. Maarten, Boneiro, St. Eustatius y Saba. Pero mas specificamente, e ta pa explora y stimula uzo di emission-free powered flights pa opera dicho conexion aereo.
TASK FORCE PA DCCA
Manera acorda den e MOU, tur director ehecutivo di DCCA ( (Dutch Cooperation of Caribbean Airports) a determina e constelacion pa e Task Force. E task force lo tin e trabou pa desaroya un Joint Strategic Plan (JSP) pa mehora e conexion entre e islanan.
E task force ta conta cu diferente experto y profesional den aviacion cu Marieke Smit (Royal Schiphol Group) como director di e programa, Suzy Kartokromo (aeropuerto di St. Maarten) como director adhunto di e programa, Jo-Anne Meaux-Arends (aeropuerto di Aruba) y Peggy Croes (aeropuerto di Corsou) ambos lo ta encarga cu e desaroyo comercial, Christine Driessen (aeropuerto di Boneiro) lo ta encarga cu e infrastructura di aeropuerto/ stacion di carga y tur standard y Vishal Oedjaghir (aeropuerto di St. Eustatius y Saba) como experto den PSO (Public Service Obligation). Asina tur e islanan den Reino Hulandes ta debidamente representa y lo traha pa alcansa e obhetivo final di e MOU firma na november.
RESULTADO DI E TASK FORCE
Na final di aña 2023, e task force lo mester entrega e Joint Strategic Plan (JSP) cu indicacion cla di un forma cronologico di con lo alcansa e obhetivo final pa un red di conexion mas accesibel, eficiente y sostenibel entre e islanan.
Den e plan strategico mester tin lo siguiente:
1: E factibilidad y establecimento di un centro di innovacion interinsular pa aviacion sostenibel, pa stimula y facilita e uzo di vuelo cu motor di cero emision pa e conexion aereo entre e islanan menciona.
2: E posibilidad-, medio- y medidanan pa por logra un fluho di pasahero cu fluidez, continuo y eficiente den e vuelonan interinsular na e aeropuertonan di e islanan CAS y BES, incluyendo e simplificacion di e rekisitonan di entrada/salida mediante e uzo di avance tecnologico den biometrics y identificacion digital entre otro.
3: Recomendacion tocante e cambionan necesario di ley, reglamento y cualkier policy relaciona cu e obhetivo final.
4: Recomendacion tocante con pa haci cu e biahenan entre e islanan ta mas accesibel pa publico.
E progreso di e task force lo ta bou supervision di un Progress Committee, cu ta consisti di e Kingdom Countries Aviation Steering Group (‘Regiegroep Luchtvaart voor de Koninkrijkslanden’) y e directornan ehecutivo di e aeropuertonan cu ta cay bou DCCA. E Dutch Civil Airports Association tambe lo nombra un representante den e Progress Committee.
Joost Meijs, CEO di aeropuerto di Aruba y alabes presidente di DCCA a comenta cu: “Ta fantastico pa mira cu colectivamente nos a logra defini un task force solido cu varios profesional den aviacion den Caribe y mundo. Mi ta convenci, cu hunto y cu e apoyo di tur e islanan y paisnan den Reino Hulandes, nos lo mehora e conexion interinsular den tur aspecto”.
TOCANTE DCCA
E Dutch Caribbean Cooperation of Airports (DCCA) ta un cooperacion entre e seis aeropuertonan di Caribe denter di Reino Hulandes. E obhetivo di DCCA ta pa mehora e calidad general di cada aeropuerto individual pa medio di facilita asistencia mutuo y intercambio eficiente di informacion, transferencia di conocemento y intercambio di experiencia cu e obhetivo di logra economia di escala. DCCA tin como obhetivo pa presenta diferente opcion di transporte aereo alternativo cu enfoke riba futuro, p’asina mehora e conexion entre e islanan di Caribe Hulandes.
ORANJESTAD – Mas cu mitar di studiantenan local (Aruba) cu a studia usando e prestamo escolar ‘Dienst Uitvoering Onderwijs voor studenten en scholieren’, conoci como DUO, tin problema pa paga esaki bek , ta paga menos cu nan mester paga, of mas pio, no ta paga nada bek mes. E grupo aki ta sigui ta un problema segun representante di DUO, Marit Verbogt manera cu e la splica diahuebs den e programa Noticiacla LIVE. Si tin mas of menos 4000 ex studiante cu tin cu paga bek, y ta algo di mas di mitar tin e problema, por deduci cu e cantidad aki ta mas cu 2 mil studiante local. Verbogt ta splica kico e situacion ta, den e video adhunto. E siman aki e representantenan ta na Aruba te cu otro siman diabierna pa atende cu e grupo aki y tambe studiantenan cu kier un beca via DUO. Nan por acudi na e centro John F Kennedy durante oranan specifico cu ta ubica riba e pagina di FB di nan y tambe e portal di DUO.
ORANJESTAD – E situacion di Dengue na Aruba ta birando mas alarmante. Diahuebs Departamento di Salud Publico a informa cu a cuminsa hospitalisa hende cu ta infecta cu Dengue. Ta trata di 2 persona. Un di e personanan aki ta bek na cas, y e otro ta sigui interna cu complicacionnan serio debi na Dengue. Por a verifica cu ningun di e personanan aki a biaha recientemente, indicando cu ta trata aki di dos caso di Dengue di transmision local. DVG ta informa tambe cu ta observando mas caso cu ta di spera – of cu ta normal – pa e temporada aki.
ORANJESTAD - Entrante augustus 2024 e alumno di klas 1 lo siña lesa y skirbi na Papiamento. A organisa un trayecto di preparacion pa asina ekipa e cabesante y e maestro di klas 1 di scolnan basico (basisschool) cu e hermentnan necesario pa por implementa e parti aki di e maneho nobo di idioma den scol.
ORANJESTAD - Entrante 18 di april 2024, pa 9or di anochi via TeleAruba, Aruba completo lo por cuminsa presencia e serie documental ‘Blue Lizard Effect’. Un serie documental revolucionario cu ta profundisa su mes den e mundo fascinante di Aruba, pero di un angulo diferente. E serie ta explora e concepto energetico di felicidad y e conexion profundo cu e cultura, e hende, y naturalesa di e isla.