Dump na Parkietenbos tabata na candela riba prome dia di bishita di Pareha Real

SIMEON ANTONIO – Un bista cu hopi a teme p’e, a bira realidad riba e prome dia cu e Famia Real a yega Aruba dialuna mainta, esta e candela for di Dump na Parkietenbos. Aunke cu e dump oficialmente ta cera for di 31 di December 2023, esaki no a stop e candela di presenta, sea intencional of no, pero e tabatey. Y for di fotonan cu a wordo saca directo y indirectamente di e candela, por mira claramente cu e Famia Real por a wak esaki tambe. Riba screenshot di un video di un post riba e pagina di Parkietenbos riba facebook y un potret di gobierno unda cu ta mira e famia riba pista di aeropuerto na yegada, ta mustra claramente con e huma ta visible. 

REACCION

E hecho aki a crea dos tipo di reaccion, esta uno di e campo cu tabata den cierto forma ‘contento’, ya cu awor e propio Rey y resto di famia por a mira e situacion na Parkietenbos cu ainda no ta resolvi, aunke cu a cera e dump. Nan argumento tabata cu mester stop di tapa cos pa e Famia Real, y mustra e realidad manera cu e ta, esta cu esaki ta un di nos problemanan serio di medio ambiente cu nos tin. E otro campo tabata uno cu a condena e acto aki, indicando cu esaki ta haci intencionalmente pa pone Aruba den un luz negativo, y cu actonan asina imposiblemente por ta di hendenan cu kier Aruba bon. 

BISHITA DI REY NA DUMP?

Ta un realidad tambe cu durante e ultimo temponan ora cu tin bishitante di gobernantenan di Hulanda, varios ta hacie un punto pa durante nan bishita, bay wak e situacion na dump personalmente, y pone nan mes na altura y combersa cu e habitantenan. Entre nan tin e propio secretario di estado Hulandes Alexandra van Huffelen, y mas recien, e miembro di Tweede Kamer pa partido D66, Jorien Wuite cu e luna aki mes tabata na Aruba y a bishita e dump y papia cu algun habitante. Hopi a spera cu lo tabatin un bishita planea di e famia Real pa mira e dump, pero esaki no ta oficialmente riba e agenda. Nan lo pasa eybanda si na caminda pa San Nicolas, pero no ta conoci si lo desvia pa ‘tira un bista’ eynan. Conocido activista Anouk Balentina a publica un carta habri pa Rey Willem Alexander, exponiendo e situacion, cual carta a keda publica tambe riba Noticiacla.com entre otro. 

REALIDAD

E realidad ta keda si cu,- los di e echo cu si e ta intencional of no of si ta coincidencia of no cu ta net riba dia di yegada di e Famia Real -, cu e cierre di dump no a stop esaki di ta na candela. Durante e prome candela despues cu a cera e dump, e mandatario encarga a admiti cu esaki lo por sigui pasa, pero ‘cu ta trahando riba dje’ pa evita. Un realidad ta cu e area rond di dump, ta ‘hancho habri’, osea cu mientras cu e dump ta cera, cualkier hende por subi y yega na dje y haci su maldad door di cende esaki. Esaki ta pone cu mientras cu a haci hopi fanfaria pa cera esaki, porta mester a percura pa cera esaki bon prome, y evita cu tin aceso na dje for di otro caminda cu no ta e porta principal. Tanto bal cu e porta grandi ta cera na candal,  mientras cu rond ta habri cu entrada di otro forma, ta loke hopi tabata comenta tur e tempo aki.