Aruba ta cla y dorna pa ricibi bishita di famia Real

ORANJESTAD – Un dia faltando pa e Famia Real yega Aruba, nos isla (parti di Oranjestad por lo menos), ta mustra di ta cla pa ricibi e invitadonan aki di un forma festivo. Automobilistanan por a mira un adorno total di bandera di tanto Aruba como di Hulanda na varios parti crucial di e ruta na Playa unda cu e Famia Real lo pasa y bishita. Y cada un di e lugarnan ta mustra e festividad cu banderanan aki den diferente forma. Hasta Rennaisance Hotel a dorna un serie di su balconnan cu e respectivo banderanan di Aruba y Hulanda, y tambe a pone banderanan otro caminda riba e ruta. Gobierno tambe a haci su parti di dorna su parti. Na tur, e bista ta uno bunita cu a haya bon reaccion di comunidad, segun un reaccion inicial cu e portal aki a haya di e potretnan. E famia ta yega Aruba dialuna mainta y ta keda Aruba te cu diaranson mainta ora cu nan subi barco Hulandes rumbo pa Corsou.