Lisette Malmberg ta retira como lider di partido PPA

ORANJESTAD – “Despues di profundo reflexion, mi ta anuncia mi resignacion como lider di Partido PPA pa asina sigui dedica mi mes na trabounan filantropico y actividadnan cu organisacionnan y fundacionnan local cu metanan comun” Asina Lisette Malmberg a bisa den un carta di despedida diahuebs. “ Mi compromiso pa mira nos realisa nos “miho mes” ta keda kima den mi y mi lo sigui traha den diferente forma pa por contribui na e bienestar di nos gran pais” Malmberg a sigui bisa den e carta. 

PAKICO RETIRA 

Segun Malmberg mes ta bisa, cu e la pensa cu por ta for di “paden” den politica lo ta posibel pa trece un diferente forma di pensa, un cambio den nos liderazgo y gobernacion.  “Mi a tuma curashi pa drenta un area cu poco den sector priva kier drenta, pero mi no a realisa kico ta rekeri pa ta exitoso den politica na Aruba, y mi tin cu admiti cu ami no ta e persona indica pa esaki, pasobra mi contribucion y influencia ta miho inverti  trahando den e area civico y social” e ta sigui bisa. “Mi a conclui cu e ta tuma responsabilidad di cada un di nos como ciudadano y residente pa transforma un nacion. E no ta solamente un responsabilidad politico” e ta sigui bisa.

GRADICIMENTO 

“Mi kier a gradici tur persona cu den cualke forma a encurasha, sostene y finalmente vota pa PPA. Cada un cu a pone nan confiansa den mi persona…masha danki” e awor ex lider a bisa. PPA lo sigui ta un plataforma politico cu compromiso pa cambio real y ta trahando duro pa reorganisa y busca lidernan den comunidad cu kier y por trece un cambio den e area politico. “Pronto mi lo informa tocante e proximo proyectonan cu mi ta formando parti di dje” Malmberg a finalisand. Lesa e carta completo AKI.