Aruba Marriott Resort a kibra record den cantidad di promocion den 2022

ORANJESTAD - Aruba Marriott Resort a kibra record den cantidad di promocion den 2022. Aña pasa, despues di pandemia, Aruba Marriott Resort & Stellaris Casino a nota un record den promocionnan interno, compara cu tur su casi 28 añanan di existencia. 

RETO

Di un banda e ta demostra cu e asociado awendia gusta reta su mes y cambia direccion. No necesariamente ta keda den e mesun ramo pa semper, sino ta sinti e necesidad pa cambia di carera, pero den e mesun compania. Pero di otro banda, ta demostra cu Aruba Marriott Resort & Stellaris Casino, siendo un di e hotelnan di mas grandi na Aruba, ta brinda y hasta ta promove e oportunidadnan aki memey di su asociadonan. E ta un forma pa tene bo mesun empleadonan contento, laga nan crece, educa nan mes mas y conta riba un nivel mas halto di lealtdad y compromiso. 

DI HR PA ACCOUNTING

Dies aña pasa Patricia Miranda a inicia su carera na Aruba Marriott Resort & Stellaris Casino como Human Resources (HR) Coordinator. Un tempo despues a promov’e como HR Executive Assistant. “Danki na e guia y motivacion di mi lidernan mi a asumi e funcion di HR Supervisor”, Patricia a enfatisa. Como HR Supervisor el a traha hopi di cerca cu e departamento di accounting, specificamente cu payroll. Door di traha di cerca cu e departamento, Patricia a cultiva un pasion nobo. El a comunica su pasion na su manager y hunto a traha riba un career plan p’e por logra su metanan den e area profesional. Asina el a asumi su prome funcion comopayroll manager den e departamento di accounting.

DI BANK’I SCOL PA UN HEFE DEN FINANSA

Arthur Santos, Director of Finance Operations di Aruba Marriott Resort & Stellaris Casino, a gradua na aña 2017 y a select’e como Finance Voyager. E Finance Voyager ta parti di un programa cu ta dura entre 12 pa 18 luna. Despues di e programa aki ta prepara e trahado pa bira un manager. Na momento cu el a termina cu e programa el a bira un Accounting Manager. Despues el a asumi e funcion di Financial Controller den casino y poco despues el a asumi e funcion di Senior Assistant Director of Finance. 

DI HR PA F&B MANAGER

Maurits Malmberg, Food and Beverage Manager, a cuminsa su carera na Aruba Marriott Resort & Stellaris Casino na aña 2018. El a yega Aruba Marriott Resort & Stellaris Casino for di sector publico. Malmberg mes ta conta cu e tabata un cambio hopi grandi. El a cuminsa traha den HR como HR Coordinator y e tabata encarga cu training & development. El a asumi su funcion cu hopi placer.  Despues di tres aña el a crece den e departamento. E tabata encraga cu tur contratista y evento pa asociado den e hotel. Poco despues Maurits a mira e oportunidad pa crece. El a tuma e decision pa crece den un departamento diferente cu ta F&B Department. El a solicita pa e funcion y awo orguyosamente e por bisa cu e ta e F&B Manager. “Nos tin un ekipo hopi dinamico y cu hende cu hopi experiencia den F&B”, Malmberg a reitera. 

DI E.P.I. PA “CHEF DE PARTIE”

Irene Hazbun actualmente ta un Chef de Partie na Aruba Marriott Resort & Stellaris Casino. El a cuminsa su trayecto como un apprentice na momento cu el core stage pa tres aña como studiante di Colegio E.P.I. Ora cu el a termina cu su estudio, a promov’e como Cook II. Irene a traha den tur departamento di cushina. E siguiente promocion cu el a ricibi ta esun di Cook I y esaki tambe a bay bon. Irene ta gusta y disfruta di su trabou di tur dia siña algo nobo. 

Reuella Reeberg-Berg, Human Resources Manager na Aruba Marriott Resort & Stellaris Casino, a expresa cu hopi orguyo cu nan a cera aña 2022 cu 137 promocion entre asociadonan. Esaki ta algo cu Aruba Marriott Resort & Stellaris Casino ta orguyoso di dje, mirando cu a surpasa e cifra di promocion duna na aña 2021. Reeberg a enfatisa cu e cantidad di promocion ta demostra cu Aruba Marriott Resort & Stellaris Casino ta un compania caminda su asociadonan por siña, crece y desaroya, tanto personal- como profesionalmente.