Partido AVP a entrega denuncia contra ex minister Besaril

ORANJESTAD – Parlamentarionan Arthur Dowers y Mike de Meza na nomber di partido politico AVP a entrega denuncia contra ex minister plenipotenciario Guilfred Besaril diamars mainta. Esaki pasobra segun parlamentario Dowers, nan no ta kere den e investigacion cu a tuma lugar contra Besaril, y cu ainda no a tuma paso contra dje. Como tal, nan a mustra cu nan no ta keda keto y kier pa ministerio publico investiga e loke a sosode na Arubahuis, y pa e ora tin un investigacion real. Segun e politiconan di e partido berde, nan lo usa e mesun ‘draaiboek’ cu MEP a usa, di denuncia miembronan opuesto ora cu nan haya cu algo no a bay bon. Aunke nan no a haci mencion specifico, e parlamentarionan ta referi na e denuncia haci e tempo ey pa dos parlamentario di MEP (awe nan ta minister) contra colega di partido Benny Sevinger.