Jetblue ta cuminsa bula bek pa Aruba desde Newark na juni

NEW YORK - Jetblue ta cuminsa bula pa Aruba atrobe desde Newark na juni awor. Tabata for di augustus di aña pasa cu Noticiacla.com a bin cu e primicia cu e laga e buelo di Newark cay, cu te hasta a gara aeropuerto di Aruba di sorpresa. Awor a anuncia cu ta reanuda e buelo aki, completo cu anuncio di fecha, , cu ta 15 di juni proximo. Esaki ta nifica cu entrante e fecha menciona, e aeroliña lo bula tur diasabra directo pa Aruba for di Newark. E ta bulando caba for di JFK, pero awor tin mas opcion. Esaki ta nifica cu fuera di New York y Boston, Newark ta bira un opcion mas. 

E ANUNCIO INICIAL

Tabata na augustus di aña pasa (2022) cu e aeroliña Mericano JetBlue Airways a anuncia varios cambio drastico den su netwerk di ruta durante fin di siman, cu tabata te hasta inclui Aruba. Y NoticiaCla a compronde cu un di e cambionan a te hasta gara autoridad di aeropuerto di Aruba di sorpresa. E aeroliña a anuncia cu tabata corta por lo menos 37 ruta na 2023, y entre nan e ruta di Newark y Ft Lauderdale pa Aruba, pero tambe mas otro ruta importante den Caribe. Ft Lauderdale tabata premira, segun e ehecutivo di aeropuerto di Aruba Jo-Anne Arends. “(Newark) no tabata anticipa” Arends a sigui bisa sinembargo, refiriendo riba e eliminacion di Newark. Mes momento, Arends a sigura e momento ey cu e cambio no ta uno negativo, ni pa motibo di falta di stoel. Ta simplemente un shift operacional, unda cu nan lo añadi mas ruta for di New York y Boston. Arends a confirma cu nan mes tambe lo bin cu nan anuncio mas laat awe. 

E CAMBIO

Segun e noticia di Merca, hopi di e rutanan aki tabata suspendi caba, pero e momento ey a kita nan completo di schedulenan di futuro. E aereolina a sigura e momento ey cu e cambionan ta pa ‘sigura confiabilidad operacional’. Esey a pone cu nan a anuncia e cambio di schedule pa e proximo lunanan y den 2023 cu lo a extende algun di e suspencionan cu nos a implementa anteriormente e aña aki”, e aeroliña ta sigui bisa.