Grupo di habitante di Parkietenbos a pidi miembro di Tweede Kamer pa Hulanda interveni den problema di dump

ORANJESTAD – Miembro di Tweede Kamer di Hulanda, sra Jorien Wuite, a bishita e dump na Parkietenbos dialuna, durante su bishita cortico na Aruba. Manera ta conoci, e dump a keda cera dia 31 di December 2022, como plan di gobierno pa evita mas problema di salud pa e bario en cuestion. E mandatario Hulandes a mustra interes pa bishita e area aki como parti di su agenda ocupa di dos dia di bishita. E la cuminsa su bishita oficial dialuna na Aruba. 

NGO

Durante e bishita, e la topa cu un grupo di habitante di e bario, entre nan e conocido activista sra Anouk Balentina cu a organisa y coordina e bishita aki pa Wuite. Hunto cu mas habitantenan di e bario, manera conocido Marjorie Vermeer y presidente di e NGO     Stichting Rainbow Warriors Core Milton Ponson, Balentina a duna un splicacion di e situacion actual real manera cu nan ta wak e. Notable tabata presencia tambe di parlamentario pa partido AVP   mr. dr. Ryçond R. Santos do Nascimento (AVP), cu a profundisa su mes tambe riba e tematica aki. Na tur, a trata e historia cortico di e dump y tur accion cu nan a tene den pasado contra e dump. Ademas a trata e bataya huridico di Balentina pa logra cera e dump, y tambe e miedo cu habitantenan tin pa e efecto cu e dump tabatin y lo por sigui tin riba nan salud. E grupo a splica Wuite tambe nan pensamento riba e forma con gobierno y minister en cuestion ta atendiendo e asunto y tur cos cu segun nan lo ta robez cu e situacion actual. A trata entre otro e problema di e incinerador, fayonan y incumplimento cu permisonan, y sentencia di huez.  Y tambe e forma con segun nan, e minister no ta scucha nan y ta atende di un forma no professional cu e situacion.  

AYUDO DI TWEEDE KAMER

A urgi e miembro di Tweede Kamer pa duna e tema aki e atencion necesario cu su coleganan na Hulanda, incluyendo e secretario di estado Hulandes van Huffelen. Nan peticion specifico tabata pa Hulanda aplica articulo 43 di statuut y forza Aruba pa tuma medidanan real y adecuado pa sanea e situacion. Riba potretnan por haya un impresion di e bishita cortico.