Joran vd Sloot sentencia na 18 aña di castigo extra pa traficacion di droga den prison

=CHALLAPALCA - Joran van der Sloot (35) a keda sentencia dialuna na 18 aña extra di prison na Peru, pa traficacion di droga. Su abogado a confirma esaki na prensa Hulandes. Van der Sloot lo tabata trafica droga na gran escala for di e prison na Juliaca unda cu e ta sintando castigo pa asesinato di Stephany Flores na 2010. Ley di Peru sinembargo ta bisa cu un castigo di prison no por dura mas cu 38 aña, esaki ta nifica cu envez di 46 aña total, e lo mester sinta 38 cu ta nifica cu e por recobra su libertad te na 2045. 

E CASO

Segun informe, Van der Sloot tabata laga cocaine drenta prison via un miembro di famia di un otro   detenido, den tiponan di producto di cuminda. Segun corte, su rol tabata crucial unda cu e tabata bende e droga na otro detenidonan, pero tabata manda e droga via paketenan di post pa exterior. Esaki a resulta den un ruta lucrativo te ora cu e guardianan a descubri esaki. 

CASTIGO

Cu e castigo extra aki, e tin cu sinta e castigo maximo aworaki. Corte a atende seriamente cu van der Sloot pa su acto, mirando cu aunke e ta sintando un castigo caba, e la gewoon sigui cu actonan criminal y pesey a baha pisa riba dje. Van der Sloot ta sospechoso tambe den desaparicion di e damita Mericano Natalee Holloway na 2005 na Aruba. E caso ey nunca no a keda resolvi. NOTA: E potret ta di archivo di Noticiacla dia di e caso di asesinato di Stephany Flores na 2010.