A extradita 4 homber y 1 muher pa Merca for di Corsou pa traficacion di droga

WILLEMSTAD - Un kaso grandi di trafikashon di droga i labamentu di plaka a kondusí na detenshon di 5 persona di kual 3 yu di Kòrsou i 2 hamaikino na ougùstùs di aña 2021. Awor ta asina leu ku awe mainta a ekstraditá e detenidonan pa Merka.

Ta trata di e hòmber

L.H.H. di 52 aña di edat i e muhé, S.A.M.B. di 37 aña di edat ku a keda detené na Haitiweg. Un kas basta luhoso porsierto i kaminda e tim di investigashon a konfiská diferente dokumento importante pa e investigashon.

Na De Savaan tabatin otro entrada hudisial e tempu ei kaminda a detené e hòmber E.R.E.S di 34 aña di edat.

Tambe e dia ei a bai un kas na The Bottomweg kaminda a detené dos ruman hòmber respektivamente J.C.M.B. di 35 aña di edat i J.C.M.B. di 37 aña di edat. Aki tambe a sali for di e kas ku diferente dokumento.

Un tim investigativo di Divishon Krímen Organisá konhuntamente ku personal di Ministerio Públiko, RST, Warda Kosta i Tim di Aresto ta esnan ku a kondusí e detenshonnan. Tur sospecha den e kaso grandi di droga i labamentu di plaka.

Nan ekstradishon ku a wòrdu pidí pa outoridatnan Merikano di Homeland Security Investigation.

E kaso aki ta basta grandi teniendo na kuenta ku efektivonan di RST asta for di Ulanda tabata na Kòrsou pa e entradanan hudisial i e detenshonnan na aña 2021.

E grupo aki a purba bringa nan ekstradishon pa basta tempu. Algun luna pasa tur kos tabata praktikamente kla, pero a wanta ku esaki mirando ku e tempu ei ainda Merka tabatin algun eksigensia relashoná ku bakunashon pa drenta e pais. Esaki ya no ta vigente i konsekuentemente a kontinuá ku e proseso di ekstradishon.NOTA: Texto ta scirbi den Papiamento fonetico di Corsou.