Minister: Ta sigur cu lo mira mas candela riba Dump aunke cu e ta cera

ORANJESTAD – Manera cu noticiacla a raporta caba e siman aki, e dump na Parkietenbos tabata na candela atrobe. Pa e minister encarga, Ursell Arends den un reaccion pa e portal aki, esaki tabata algo di spera y no ta un sorpresa p’e. “Mi ta sigur cu e lo no ta e ultimo candela cu nos lo mira eyriba” e mandatario a sigui bisa. “Pero ami ta keda positivo pasobra e candela aki ta e ultimo roseanan di un landfill moribundo cu ta e resultado di un metodo anticua di anda cu desperdicio”. Segun e mandatario,  mescos cu e dump pa hopi aña a sofoca e habitantenan di e area, awo nos ta sofocando e candela y poco poco kimamento eyriba ta pasa pa pasado.

NO DUNA FUEL

Segun e mandatario, pa paga e candela riba dump nos mester stop di dun’e fuel. “Esey ta loke mi a bisa na februari 2022, na momento cu nos a lansa ‘Trash-2-Cash’” e la sigui bisa. Segun e mandatario, ta e projecto ey a haci posibel cu nos por cera e landfill na fin di 2022 pasobra awo nos tin otro forma pa anda cu desperdicio. “Tur hende por compronde cu aunke no tin fuel ta subi mas riba dump, ainda nos mester bay atende cu e fuel cu a keda eyriba. Ta 70 aña di desperdicio cu por cuminsa kima na cualquier momento atrobe, pasobra tin hopi gas y otro material cu por kima” e mandatario a sigui bisa

REDIRIGI E FUEL

E mandatario a splica cu asina aki e bataya contra e candela ta sigi : despues di redirigi e fuel y sera dump, e siguiente paso ta pa kita e oxigeno tambe. “Esey bo ta logra door di pone un capa di material qualifica riba e sero” e mandatario a bisa. Ademas e ta splica pakico tin un compania Hulandes encarga cu e proceso. “Ta hustamente p’esey nos ta trahando cu un companía Hulandes renombra y cu hopi experiencia riba e terreno aki. Ideal lo ta pa ‘capping’ bay den combinación cu ‘mining’, cual ta duna posibilidad di saca material back for di e sero. Mi ta papia di material cu pa algun negoshi ta materia prima, grondstof, y por wordo re-uza den produción economico” e la sigui bisa.

FUTURO DI SERLIMAR

E mandatario a sigura tambe cu e compania Serlimar mes ta un compania cu tur derecho di existencia. ”E la pasa den tempo duro, pero e ta riba bon caminda. Mescos cu ta preparando futuro nobo di e tereno na Parkietenbos, nos ta preparando pa un Serlimar full revitaliza. Esaki ta cuminsa cu focus loke tin na material y recurso riba loke nan ta haci bon, esta e parti di ophaal. Serlimar ta garantisa su mes futuro ora e garantisa servicio excelente na su clientenan. Y nan por esey. Na mes momento nos ta preparando caba pa Serlimar tambe drenta e arena di ‘verwerking’ y asina un Serlimar full revitaliza lo ta parti tambe di e sector economico nobo aki”. 

SPECULACION

E mandatario no kier a specula si e candela di ayera ta natural of un forma di protesta contra e seramento. “Nos tur sa cu semper lo tin resistencia na cambio y e cambio aki ta uno grandi. Nos sa tambe cu resistencia y oposicion lo bin den hopi forma. E por ta agresivo manera sende candela, pero igual e por ta “passive-aggressive” manera hendenan cu ta nenga di coopera cu e sistema nobo. Tin hende cu lo mustra nan desacuerdo por ehempel door di tira sushi den mondi of otro lugarnan. Esaki ta un forma di protesta tambe pero e ta bisa hopi mas di e hendenan mes. E ta bisa cu esaki ta esnan cu ta prefera pa nos sigi cu e sistema di kima sushi riba dump. Te awe loke mi a scucha ta cu gran mayoria di nos hendenan ta comparti e pensamento cu ya ta basta cu e dump na Parkietenbos” e mandatario a continua bisando.

NEGOSHI TIN CU CERA PORTA

E posibel ceramento di negoshi tambe a keda trata pa e mandatario. E ta mustra cu e la tende cu seramento di dump lo causa cu algun negoshi lo no por sigi funciona. “Mi no ta descarta cu esey ta un posibilidad. Pero e negoshinan cu lo fracasa ta esnan cu kier bringa e cambio y ta keda insisti riba un business-model den cual nan por tira sushi den scochi di Gobierno, pa Gobierno bay kima na Parkietenbos. Eseynan lo cay afo. Pero den e sistema nobo lo tin espacio pa negoshi lanta y bira exitoso trahando cu un business-model caminda desperdicio separa ta wordo hiba na lugarnan cu por atende cu nan na un forma responsible”.