Wever-Croes: Aña 2023 lo tin hopi cambio y cu impacto fuerte pa nos tur

ORANJESTAD – “ Nos ta mira un aña nobo nos dilanti, cu hopi optimismo. Cu oportunidadnan nobo, pa crea progreso y bienestar pa tur ciudadano”. Asina prome minister Evelyn Wever Croes a bisa durante su discurso nacional di fin di aña. Fuera di repasa tur e logronan di su gobierno, e mandatario a para keto tambe pa loke ta spera nos den 2023. Segun e mandatario, ta spera pa atrae inversionnan nobo, pa diversifica nos economia, specialmente riba tereno di energia, pa asina hunto cu e pilar di turismo, brinda Aruba e stabilidad necesario pa no solamente ‘bounce back’ di e crisisnan, pero pa ‘bounce forward’, pa recupera mas fuerte y resiliente.

UNION Y POSITIVISMO

E mandatario a splica tambe cu segun e, e yabi pa nos exito den 2023 ta union y positivismo. “ Historia di nos pais a demostra con mas fuerte nos por ta, si nos Uni. Diferencia di opinion por t’ey, contal cu semper tin respet. Y irespecto e diferencia di opinion, ora ta trata di Aruba, mas uni nos ta, mas fuerte Aruba ta”.  

HOPI CAMBIO Y IMPACTO

E mandatario a sigura tambe cu aña 2023 ‘ lo trece hopi cambio pa cada un di nos, y nan impacto riba cada un di nos lo ta fuerte’. “Sin embargo ban carga e positivismo cu tur e cambionan aki lo trece cosnan bon pa nos, lo crea e progreso y bienestar cu nos ciudadanonan merece”.