Wever: Gobierno y sector priva mester uni pa por revitalisa centro di Oranjestad

ORANJESTAD  - Gobierno y sector priva mester uni pa por revitalisa centro di Oranjestad. Esey ta pensamento di minister di economia Geoffrey Wever. Segun e mandatario, pa algun tempo caba miembronan di Parlamento di Aruba, ciudadanonan, comerciante y diferente gremionan a expresa nan preocupacion pa cu e estado cu nos centro di ciudad ta permanece aden. Nan a pone accento ariba e responsabilidad cu gobierno di Aruba tin y cu gobierno di Aruba mester activa mas rapido posibel y trece bida bek den nos centro di ciudad. Un reto, cu segunWever, a hereda y a tuma e encargo aki cu dos man.

SONDEO

Despues di hopi sondeo y planifacion, mei mei di stakeholders dia 13 di december ultimo, Minister Wever a presenta e prome fase di Revitalisacion di Oranjestad: Embeyecimento di e area di Wilhelminastraat cual lo cuminsa den awor den luna di januari 2023. Como parti di e revitalisacion, a habri caya Betico F. Croes, un biaha mas pa trafico, a re-derigi e tram y asina poco poco ta implementado e strategia cu lo mester yega na revitalisa e area. 

MAS PROYECTO 

Wever a divulga tambe cu hunto cu sector priva, den lunanan nos dilanti lo anuncia algun proyecto, manera proyecto di apartamento, proyecto di residencia pa studiante, y move departamentonan di gobierno den centro di ciudad. 

“Tur esaki seguramente no por ser logra sin cooperacion estrecho entre sector priva, nos institutonan financiero, y gobierno di Aruba. Gobierno cu e poco fondonan disponibel a dal e prome stap y ta spera cu e compromiso financiero aki por crea confiansa den sector priva pa hunto crea un ciudad vibrante” e mandatario a sigui bisa. Segun Wever, ciudadanonan mester por considera pa bin biba den centro, y pa hasi negoshi hunto cu entretenimento. Alabes, turistanan mester por haya e caminda bishita bek mas frecuente. Pa añanan largo no ta logrando pa atrae turista den centro. “Gobierno su so no lo por crea e condicionnan necesario pa crea e realidad nobo aki”.  

E mandatario a sigura cu e ya ta den combersacion serio cu algun insituto financiero, presentando plan y compartiendo su strategia y ta wak cu poco poco e apetit ta creciendo pa inverti nos centro di ciudad. E ta bisa tambe cu segun analisis haci pa departamento di Asunto Economico, Comercio y Industria, inversion den nos centro di ciudad no lo solamente ta nifica revitalisacion di nos centro pero lo tin consecuencia positivo pa nos economia en general. Cada 10 miyon florin di inversion den nos economia, lo conduci na un crecemento economico nominal di 0,1 prociento di nos GDP. Pesey, pa logra e impacto maximo, y un ‘spin-off effect’ nacional, hunto so lo por logre.  

"Nos atencion special pa e area aki no lo tin beneficio solamente pa e area pero ta un forma pa crea mas actividad economico y inversion na nos pais",  Wever a finalisa bisando.