DIMP: Cambionanan fiscal 2023 ta encera compensacion, reparticion husto y miho cumplimento

ORANJESTAD – Departamento di impuest (DIMP) e siman aki a duna un splicacion den cuadro di implementacion di e ley di Plan di Impuesto 2023, cu lo drenta na vigor entrante 1 di januari 2023 treciendo varios cambio den nos leynan di impuesto. DIMP como tal kier a mantene tur contribuyente informa di e cambionan mas importante pa asina nan por tin e preparacion necesario

E PLAN DI IMPUESTO

E ley di Plan di Impuesto 2023 a keda aproba oficialmente door di Parlamento diaranson 14 di december 2023 y a keda publica: “Afkondigingsblad van Aruba 2022 no. 161”. Ta introduci un tarifa nobo di BBO entrante 1 di januari 2023 cu lo resulta den un tarifa combina di BBO/BAVP y BAZV di 7%. Ta introduci un pakete di compensacion pa mitiga e efectonan di inflacion

AREGLO COMERCANTE CHIKITO

Pa e areglo pa comerciante chikito (“kleineondernemersregeling”), ta reduci e limite di entrada di Afl. 84.000 pa aña pa Afl. 50.000 pa aña y ta absolve e comerciante chikito di e obligacion di entrega e declaracion y paga BBO/BAVP y BAZV. E simplicacion di ley aki ta reduci e carga administrativo cerca e comerciante chikito y no ta afecta un grupo grandi di comerciantenan chikito. E comerciante chikito lo tin e obligacion di declara y paga BBO/BAVP y BAZV na momento cu e surpasa e limite di entrada di Afl. 50.000 pa aña

DEFINICION DI SERVICIONAN ELECTRONICO Y TELECOMUNICACION

Un otro cambio importante den e ley di BBO/BAVP y BAZV ta cu a amplia e definicion di “servicionan” cu servicionan electronico y servicionan di telecomunicacion, radio y television pa motibonan di compliance. Alabes a amplia e reglanan pa cu e sitio unda ta duna servicio pa asina por determina cua compania tin e obligacion di paga BBO/BAVP y BAZV ora ta trata transaccionan entre companianan estableci na Aruba y companianan estableci den exterior. E definicion nobo di e servicionan cu ta cay bou BBO/BAVP y BAZV awor tambe lo encera e servicionan electronico y servicionan di telecomunicacion radio y television.

KICO TA SERVICIO ELECTRONICO?

Servicionan electronico ta por ehempel servicionan online di accounting, stockphoto/video/audio, website builder, skirbimento di documento, acceso na plataforma di data, download of mira pelicula online, download of scucha musica online. Bou servicio electronico no ta cay intercambio di informacion (conseho) via e-mail of mercancia (paña of sapato) cumpra online

SITIO DI DUNA SERVICIO

Den e ley di BBO/BAVP y BAZV a introduci tambe un regulacion nobo unda a amplia e definicion di e sitio unda un compania ta duna servicio. Normalmente un compania cu ta estableci na Aruba ta paga impuesto na Aruba riba su servicionan ofreci na Aruba. Actualmente ta asina cu si e compania no ta estableci na Aruba y ta bende su servicionan na un compania di Aruba, e compania stranhero no ta paga impuesto na Aruba, paso e no ta estableci na Aruba. Cu e regulacion nobo tin un “cambio di sitio unda ta duna servicio”. Ta considera cu e sitio unda e servicio ta wordo duna e caminda cu mester cobra e impuesto concerni,a cumpra e servicio for di e compania di exterior. E regulacion nobo ta valido pa por ehempel servicionan electronico y servicionan di telecomunicacion, television y radio

KEN TIN CU PAGA 

E situacion di cambio di sitio di servicio ta importante pa por determina cua compania tin cu paga BBO/BAVP y BAZV. E sistema aki ta uno conoci den e mundo di impuesto y ta wordo aplica tambe na Hulanda y ta conoci como “verleggingsregeling”. Ta importante pa remarca cu e ta aplicabel ora ta trata di negoshi entre comerciantenan “Business to Business” (B2B) y no “Business to Consumer” (B2C). Pues si un persona priva cumpra servicio di un compania den exterior, e persona priva no ta paga BBO/BAVP y BAZV

REPRESENTANTE FISCAL PA COMPANIA STRANHERO

E compania stranhero por nombra un representante fiscal (“fiscaal vertegenwoordiger”) na Aruba ora ta trata transaccionan di “Business to Consumer” pa asina e representante aki por actua na nomber di e compania stranhero. Consecuentemente e representante fiscal ta haci declaracion y paga BBO/BAVP y BAZV na Aruba pa e compania stranhero. E compania stranhero tin cu pone Inspector di Impuesto na altura ora e ta nombra un representante fiscal. Alabes e tin cu duna Inspector di Impuesto un copia di e carta di apoderacion na su representante fiscal

FAIR SHARE PA GOBIERNO

E regulacionnan nobo ta garantisa cu gobierno ta haya su “fair share” ora ta trata entrada di impuesto. Pa Departamento di Impuesto tambe e reglanan nobo ta sirbi pa mehora e compliance di parti di e contribuyentenan cu ta den liña di practicanan comun den e mundo di impuesto. E empresario no residente por asigna un representante permanente (“fiscaal vertegenwoordiger”) na Aruba cu ta para responsabel pa garantisa e cumplimento cu e obligacion di entrega e formularionan di BBO/BAVP/BAZV y haci e pagonan corespondiente den nomber di e empresario. Potret cortesia 24ora.com