BCA: A hisa e reserva obligatorio cu 1 punto di porciento

ORANJESTAD - Conforme e tarea di e Comite di Maneho Monetario (CMM) pa evalua, determina y duna transparencia riba e accionnan di maneho monetario di Banco Central di Aruba (BCA), BCA ta comunica lo siguiente. Durante e reunion di 22 di november 2022, CMM a dicidi pa hisa e reserva obligatorio di 24,0 porciento pa 25,0 porciento entrante 1 di december 2022. Di e manera aki, e banconan comercial mester tene un balansa minimal na BCA cu ta igual na 25,0 porciento di e depositonan riba termino cortico di nan clientenan. E decision pa subi e reserva obligatorio na 25,0 porciento ta basa primordialmente riba e bahada menos rapido di e nivel di likides excesivo na e banconan comercial, ademas di e nivel amplio di likides excesivo na e banconan comercial, cu ta persisti ariba nivelnan pre-pandemico y di cautela. 

E CMM a considera e siguiente informacion y analisis den su deliberacion:

RESERVANAN INTERNACIONAL Y OFICIAL

E reservanan internacional, cu ta consisti di reservanan oficial di BCA y reservanan di divisa na e banconan comercial a subi cu Afl. 42,0 miyon (Grafico 1) riba 4 di november 2022, compara cu fin di december 2021. E reservanan oficial a baha cu Afl. 16,4 miyon, mientras cu e reservanan teni pa banconan comercial a subi cu Afl. 58,5 miyon. Consecuentemente, riba 4 di november 2022, e reservanan oficial y internacional a suma Afl. 2.728,5 miyon y Afl. 3.171,6 miyon, respectivamente. Pa e resto di 2022, BCA ta premira mas expansion den e reservanan oficial y internacional debi na extra entrada di divisa relata na turismo.

Sostene un nivel adecua di reservanan ta critico pa mantene e tasa di cambio fiho entre e florin Arubano y e dollar Mericano. Teniendo cuenta cu esaki, BCA ta anticipa cu e reservanan internacional lo keda ampliamente riba e tres luna di pago riba e cuenta coriente di e balansa di pago. E pagonan riba e cuenta coriente di e balansa di pago ta consisti, entre otro, di pagonan pa importacion, pagonan di interes na inversionistanan stranhero y transferencianan pa exterior manera placa manda afo door di trahadonan stranhero. Ta proyecta cu e reservanan oficial lo keda dentro di e margen aceptabel basa riba e metrico ‘Assessing Reserve Adequacy’ (ARA) di e Fondo Monetario Internacional (FMI) (Tabel 1). 

INFLACION

Na september 2022, e Indice di Prijs di Consumo (IPC) a subi cu 7,0 porciento compara cu e mesun luna di e aña anterior (Grafico 2). E aumento aki tabata causa door di e crecemento den prijs di utilidad, cu a afecta e componente di ‘vivienda’ (contribuyendo cu 2,9 punto di porcentahe). Tambe e prijs di gasoline cu ta influencia e componente di ‘transporte’ (contribuyendo cu 1,6 punto di porcentahe) y e componente ‘cuminda’ a subi  (contribuyendo cu 1,2 punto di porcentahe).

E inflacion midi riba promedio di 12 luna a yega te na 4,7 porciento. BCA ta proyecta cu e preshon inflacionario lo persisti durante e resto di 2022, debi na e nivel eleva di prijs di petroleo riba mercadonan internacional y e ahustenan recien den prijs di awa y coriente. Ademas, BCA ta premira cu Aruba lo importa un gran parti di e aumentonan den prijs for di su partnernan di exportacion, particularmente Estados Unidos y Europa. 

Mientrastanto, na september 2022, inflacion basico (excluyendo cuminda y energia) a alcansa 2,4 porciento si midi e final di respectivo luna contra e mes un luna di e aña anterior. Esaki a wordo primordialmente causa pa e componente di ‘transporte’ (contribuyendo cu 1,2 punto di porcentahe). Basa riba un promedio anual, inflacion basico a yega na 2,0 porciento. 

LIKIDES EXCESIVO NA  BANCONAN COMERCIAL

E total di likides excesivo na e banconan comercial a baha di Afl. 1.320,5 miyon na december 2021 te na Afl. 791,7 miyon na september 2022 (Grafico 3). E caida den likides excesivo ta debi principalmente na e subidanan consecutivo den e tasa di reserva obligatorio durante januari 2022 pa juli 2022. Na september 2022 likides excesivo a sigui baha, sinembargo menos liher. Ademas, e nivel di likides excesivo a keda mas halto cu e nivelnan prome cu e pandemia na februari 2020 (+Afl. 102,6 miyon) y e nivelnan cu ta wordo teni pa motibonan di cautela. E nivel halto di likides excesivo probablemente tabata causa pa e nivel abou di demanda pa credito y e recuperacion den e sector di turismo.