Bou vigilancia, a reparti cargamentonan di clapchi awe marduga pa bende

WELA – Manera custumber, awe marduga bou di vigilacia estricto di polis, e cargamento di clapchi a keda suminstra pa tur bendedor y rebendedor na Aruba. E custumber ta cu dia 27 di December marduga, autoridad ta presenta na e deposito di Wela, unda cu ta reparti e clapchinan den varios container cu despues ta sali bou di vigilancia pa nan destinacion final. 

E CANTIDADFor di e experto di explosive di DOW, Rubin Ponson, e biaha aki a importa 14 container ‘nobo’ di clapchi, y a wordo reparti na Wela den mas of menos 40 container. E puntonan di benta te cu awe marduga tabata 54, pues segun e lista, tabatin 54 lugar di benta di clapchi reparti rond henter Aruba. Esaki por cambia ainda, depende cu si e puntonan aki keda cla y ta cumpli cu regla. 

CONTROLUnabez cu e puntonan di benta ta cla, y ta operacional, un team di clapchi consistiendo di polis, DOW, DVG y mas instancia, ta pasa controla e puntonan di benta y ta wak si ta cumpli cu e reglanan di seguridad, y si e clapchinan cu ta bende, por emberdad wordo bendi legalmente na Aruba. Si esaki no ta e caso, ta saca nan for di circulacion mesora. Si e lugar no ta cumpli, ta cera esaki sea temporario pa dune espacio pa drecha y habri bek, sino ta cera esaki sin dune e chens pa habri atrobe. Y si tin clapchi cu ta aproba, pero no conoci pa e comision, ta test esaki su efecto y despues ta dicidi.