Gobierno atrobe a anuncia renobacion di Compleho Deportivo Guillermo Prospero Trinidad

ORANJESTAD- Awor si ta parce cu Compleho Deportivo Guillermo Prospero Trinidad ta wordo renoba. Awor si, pasobra na 2021 caba minister di deporte di e tempo ey Dangui Oduber a anuncia cu esaki lo a sosode na 2022 y cu e tempo ey lo por tabatin weganan bek na Aruba. Pero esey no a materialisa y no ta conoci si ta e pandemia a obstaculisa e plannan, aunke cu ta ya leu den pandemia esaki a sosode. E siman aki durante conferencia di prensa, Minister Endy Croes cu awor a tuma e cartera di deporte,  a anuncia cu ta cuminsa oficialmente cu renobacion di Guillermo Prospero Trinidad na Dakota na februari 2023. E dos stadionnan di Aruba di futbol; esta Compleho Deportivo Guillermo Prospero Trinidad y Compleho Deportivo Frans Figaroa, ta desaproba desde aña 2016. E Mandatario di Deporte e indica cu e tribuna di Guillermo Prospero Trinidad ta un peliger den e momentonan aki. Di forma cu mester a cera e tribuna banda drechi completamente pa publico. Ta planea pa renoba e.o.: daknan, VIP sector, yerbe artificial y pista di atletismo. Contrario na e declaracion prome di su colega Dangui di juli 2021, no a haci mencion spefico di suma di inversion y mas otro detayes, manera cu Oduber a haci na 2021. 

CONCACAF

Campeonato di futbol Nation League di CONCACAF ta consisti di 2 wega, cual uno ta hunga na cas y uno ta hunga den exterior. Mirando e situacion critico di Guillermo Prospero Trinidad, e ekipo di Aruba mester bay den exterior pa hunga nan “home games”. Esaki ta nifica cu famia, amistad y henter pueblo di Aruba cu kier duna sosten na nos deportistanan na momento di campeonato no por haci esaki.

AVB

Banda di esaki, Minister Endy Croes a reuni cu Arubaanse Voetbal Bond (AVB) pa yuda coordina un otro sitio pa e Campeonato di Futbol 2022-2023. Tambe, a reuni cu Federacion Atletiek Bond y Centro Medico Deportivo Aruba (CEMEDAR) pa yuda sondea un otro locacion pa e temporada cu e stadion ta den renobacion. Minister Endy Croes a finalisa bisando cu pa final di aña 2023, Aruba por tin un stadion bek aproba, unda cu e pueblo di Aruba por bay apoya y aprecia nos deportistanan di cerca.

E PROME ANUNCIO

Gobierno (lesa: minister Dangui Oduber) na juli di 2021 a haci e prome anuncio e tempo ey como minister di deporte, cu lo ‘porfin’ lo a renoba stadion Guillermo Prospero Trinidad. Esaki a sosode den presencia di presidente nobo di Aruba Voetbal Bond AVB Randolf Laclé. Y e momento ey a anuncia cu esaki lo no a conta cu fondonan di Lotto, sino segun Oduber, a logra bira creativo y a cera e fondo pa via presupuesto di gobierno, financia esaki. E suma presupuesta tabata 1.5 miyon florin pa e prome fase. E trabou lo tuma a lugar den fase, unda cu e prome parti lo tabata pa pone yerba artificial (artificial turf) nobo, renoba e “kleedkamer” nan y l renoba e parti tribunal. Den e di dos fase lo a bay bay cambia e iluminacionnan di e veld y renoba e “atletiek band”. E proceso di destaho publico lo tabata encarga pa e departamento di DOW y lo a start pronto, asina e minister a declara e tempo ey.

FIFA

Minister Oduber a recorda pueblo caba for di e tempo ey riba e hecho cu ya pa varios aña caba e stadion di Guillermo Prospero Trinidad mescos cu otro facilidadnan no a conoce un renobacion y consecuentemente a conoce un deterioro. Un di e consecuencianan ta cu Aruba su seleccion nacional no por hunga weganan international na cas como cu e stadion a wordo desaproba pa FIFA.

PROME WEGA INTERNACIONAL

Presidente di AVB a declara e tempo ey tambe cu si tur cos lo a cana segun plan ya pa maart di aña 2022 lo por a tuma lugar e prome wega internacional riba e veld. E renobacion aki mester a tuma lugar pa Aruba por cumpli cu e rekisitonan poni pa FIFA. Cumpliendo cu esakinan ta haci cu AVB lo por ricibi fondonan adicional for di FIFA, asina e mandatario a duna di conoce.