AZV riba keho di un lider politico: Tin comprension pa incomunidad cu nan fiesta a causa

ORANJESTAD – OE AZV tin comprension pa e incomodidad cu nan actividad di Pasco pa empleadonan por a causa. Asina e director a reacciona dialuna den un comunicado, como reaccion riba e keho di lider di fraccion ACCION21, Miguel Mansur den fin di siman. E comunicado no ta haci mencion specifico di e partido y detayes di e keho, pero ta cla cu e ta referi na esaki. Ademas, Noticiacla a acerca e director dialuna y e la priminti un reaccion despues. Esey ta confirma pues cu e reaccion ta netamente riba e keh ey. 

KEHO DI MANSUR

Segun Mansur su keho riba pagina di Facebook, ‘mientras pueblo (asegurado) mester sufri recorte den remedi y servicio... mientras profesionalnan y industria medico mester sufri recorte den compensacion AZV tin Christmas party ya bo sa ‘. E la te hasta pone e suma cu e evento aki por a causa, esta AWG 40 mil florin y a pone e recibo tambe di e fiesta. 

AZV SU REACCION

Dialuna ora cu Noticiacla a tuma contacto cu e director, e la splica cu nan tabata den reunion y cu un reaccion lo a sali dentro di poco. Y berdad, esaki tabata e caso. Segun OE AZV, ‘prome cu tur cos OE AZV tin comprension pa e preocupacionnan expresa, principalmente den luz di e desaroyonan den e sector di cuido. Di otro banda OE AZV a tene na cuenta desaroyonan interno di su organisacion y retonan cu mester a enfrenta e ultimo 3 añanan’ e comunicado ta cuminsa na bisa. 

HOPI CAMBIO

Despues e comunicado ta papia di cambio y presion.” Nos organisacion a conoce un aumento grandi den presion di trabao desde pandemia pa motibo cu un banda a corta den personal y di otro banda di trabao diario, empleadonan mester a percura pa ehecucion di e asina yama “5 wave model”. Ademas nos organisacion mester a pasa den un trayecto di cambionan pa crea atrobe un luga di trabao sigur, saludabel y placentero. Sin duda e ultimo aki tabata un peso pa e salud mental den e organisacion”. Y finalmente, e evaluacion pa toch dicidi di haci e fiesta. Segun e splicacion, ‘ a considera tambe cu durante 2022, empleadonan a entrega mas o menos mey miyon florin di nan entrada na e fondo di AZV. Evaluando tur e desaroyonan aki den luz di e resultado positivo pa e fondo di AZV, di e bon trabao realisa den 2022 y di e cambio necesario den e organisacion, gerencia a considera necesario, despues di dos aña, continua cu e actividad di fin di aña pa gradici su empleadonan pa e bon trabao desplega ultimo 3 añanan y gradici pa nan pasenshi pa cu e cambionan den organisacion”. Y na final nan ta bisa cu “ OE AZV tin comprension pa e incomodidad cu e actividad por a causa”.