Wever-Croes: Mayoria den Parlamento a aproba ley fiscal 2023

ORANJESTAD - Diaranson mainta un mayoria den Parlamento a aproba ley fiscal 2023 Prome Minister Evelyn Wever-Croes hunto cu Minister di Finansas Xiomara Maduro tabata den Parlamento pa trata e plan fiscal 2023.   

Aruba tin un debe actualmente cu mester wordo paga y pa por paga esaki, Gobierno lo mester a pasa e ley fiscal pero sino tambe pa cumpli cu e normanan presupuestario a base di e ley di Laft, cu e mesun oposicion a bin cu ne basa riba exigencia di Hulanda y di Caft. Otro motibo ta e urgencia pa drecha e imagen di Aruba riba mercado internacional mas lihe cu ta posibel. Pa e motibo aki, Prome Minister hunto cu Minister di Finansas Xiomara Maduro a presenta den Parlamento e plan fiscal 2023 cu segun nan, lo ta e caminda pa e solucion pa adresa tur esaki. 

BENEFICIONAN DI E LEY FISCAL 2023

Segun Wever, mirando cu oposicion semper ta busca pa den tur cos trece e negativo, e la haya cu tabata importante pa subraya e partinan positivo tambe di e ley aki. Salario minimo ta bay aumenta na Januari 2023, e suma liber di impuesto ta aumenta na 30 mil florin, esaki kiermeen cu 36 mil persona no ta bay paga “inkomsten belasting” mas. E tarifa di esnan cu ta gana mas di 30 mil florin ta baha cu 2%. Esaki ta esencia di e compensacionnan cu ta wordo duna den e ley aki. Cu esaki 36,161 hende no lo paga impuesto mas. Loke ta companianan local, 8 mil compania na Aruba nan tarifa ta bay baha di 25% pa 22%.