Arubus ta anticipa cu no tin transporte di bus pa 24 ora entrante diahuebs

ORANJESTAD -  Gerencia di Arubus NV diaranson atardi a informa riba nan pagina di Facebook cu por tin interupcion of retraso mayan diahuebs. Segun e anuncio, nan ta spera un manifestacion di e trahadonan pa cual lo no tin servicio di transporte publico pa 24 ora largo, esta di mayan mainta 8’or te diabierna mainta 8’or. Segun e anuncio, e situacion ta uno ‘totalmente fuera di nos alcanse’, pues cu nan no por a haci nada pa remedia e situacion. Noticiacla a compronde cu e sindicato en cuestion, SEPPA lo ta sosteniendo un accion mas grandi cu tabatin anteriormente, pa motibo di malcontento con restructuracion di e orario di trabou di e trahadonan, primordialmente e chauffeurnan di bus. Algun dia pasa tabatin un accion di algun ora y esaki a sigui escala, te cu gerencia ta anticipa cu esaki por bira 24 ora entrante mayan diahuebs mainta. Pa no tin sorpresa, a dicidi di anuncia esaki pa mayornan, studiantenan y trahadonan cu ta usa e servicio, por traha plan alternativa.