Illes: Acusacion contra Sussebeek ta carece di berdad y a pidi absolucion integral

ORANJESTAD – Considera como porta e di dos sospechoso mas grandi den e caso penal Avestruz despues di ex minister Benny Sevinger, P. Sussebeek a haya su chens di defende su mes den corte dialuna atardi. Abogad Demis Illes di bufete DavidKockLegal tabatin e e defensa den su man. Enberdad Sussebeek tabata amigo di e ex mandatario y a haci algun peticion pa tereno durante periodo cu Sevinger tabata minister. Pero e plachi cu Ministerio Publico (OM) a pinta di dje, ta leu di ta berdad, y mas bien palabranan grandi a wordo usa pa describe e ‘operacion’ di Sussebeek den e caso aki. Periodo di oro, ceronan di oro y hopi placa pa Sussebeek. Asina  abogado s Illes a inicia e defensa pa su cliente, repasando por lo menos 34 pagina pa demonstra inocencia di su cliente. Y na final, mescos cu Sevinger, Illes a pidi absolucion integral pa su cliente. 

E CASO

Segun Illis, OM a basa su mes riba 4 punto principal den e caso contra Sussebeek. Y Illes a describi, segun version di Sussebeek, e bida real di e comerciante cu awor ta un sospechoso. “Si, Sussebeek y Sevinger tabata y ta amigo. Si, Sussebeek tabata e homber tras di algun (pero no tur) e companianan cu a pidi opcion pa tereno erfpacht y a haya nan aproba y otorga. Y si, tambe Illes ta admiti cu Sussebeek a gana bon placa cu benta di su accionan den e compania Berkem Development. Y si, Sussebeek tambe a haci donacon pa campaña di Sevinger, y a adelanta pago riba material necesario pa renoba cas di e ex mandatario. Tur ta puntonan cu OM tambe a presenta como puntonan di nan rekisitorio. Loke cu OM sinembargo, segun Illes ta sigui bisa, a haci cu palabra ta haci como si fuera cu danki na Sevinger, Sussebeek a pasa den añanan di oro, a cumpra Sevinger, y a probecha di su relacion y amistad pa chica mas posibel for di su ‘amigo intimo’ y cu e la profita di un manera bruto, di tur esaki. Tur segun Illes, sinembargo, ta palabra grandi cu OM a usa, pero cu poco biaha tin efecto riba e realidad. Y pesey tambe ta pidi absolucion intergral. 

LOCALIDAD PREFERENCIAL

Un di e argumentonan ta cu Sussebeek bou di e tempo di Sevinger, a haya terenonan ubica riba tereno privilegia. Berdad cu a haya bon tereno, pero e realidad completo sinembargo, segun e abogado, ta cu e edificionan traha riba e terenonan no ta produciendo nada y ta para bashi. Pues mucho no por a wordo haci segun Illes, y cu documento por prueba tur esaki y ta desbarata e idea cu Sussebeek lo a gana schat di placa cu e proyectonan aki. 

SOBORNO

Un di e acusacionan contra Sussebeek ta di soborno. Y usando e puntonan cu OM ta menciona, Illes ta sigui bisa, lo mester prueba nan punto. Sinembargo, e abogado ta sigui bisa, e puntonan no ta confirma soborno. “Un amistad no ta castigabel y yuda un amigo tampoco. No ta prohibi  pa haya e derecho pa un tereno erfpacht, y tampoco pa bende accion di un compania y gana placa di esey. E idea di OM por haya bida solamente si por demonstra convincentemente cu tin un relacion real entre un ayudo di un amigo y un contra prestacion. Pero segun e abogado, si no ta cu e tempo a caduca di tempo cu e supuesto ‘crimen’ a wordo cometi, ta e hecho cu tin prueba di pago pa tur e loke ta wordo acusa di dje cu a cumpra etc. E prome parti, di caducacion di termino ta stipula pa ley cu tin un tempo mara na e ‘supuesto crimen’ cometi, cu den e caso aki ta 6 aña. En corto, si un crimen a cometi di e indole ey, y no a persigui e persona den e margen di tempo ey, no por hacie mas awor.  Pues parti di e acusacion aki ta bin ta ‘cay afo’ solamente pa esey caba. Y si e argumento ey no ta valido, tin e cuestion di prueba di pago, unda cu OM no por a prueba cu cierto pagonan a wordo cometi, y otronan tur pago a wordo proba cu recibo etc. 

Como tal, e defensa ta sigura cu no tin prueba di soborno den e caso aki. A bay den hopi detaye di varios compania y transaccionan cu e sospechoso a pasa aden, pero den niun di nan, segun abogado, por sigura cu tin cosnan illegal a tuma lugar. No por papia di regalo a cambio di promesa y ayudo privilegia den forma di opcion pa tereno erfpacht. “E acusacionan ta haci a base di sospecho usando palabra grandi pero cu no ta cuadra cu realidad segun e abogado. 

LABAMENTO DI PLACA

Un otro acusacion ta labamento di placa. Segun abogado, ta bruha y ta mescla varios cos den otro cu ta haci dificil pa compronde kico exactamente ta e caso aki. Ta mustra cu si OM kier men bou di labamento di placa, cu a soborna Sevinger, e abogado kier pa absolve su cliente tambe di esaki. “Si no por papia di soborno, no por papia di labamento di placa tampoco. E placa cu ta riba un cuenta di banco na Corsou, p.e. no ta procede di un crimen. Segun e abogado, ta placa cu a wordo adkeri via un transaccion legitimo netchi”. Mester bisa cu OM a laga e parti aki tambe cay porcierto:red. E loke segun e abogado ta kere cu OM ta bisa cu a bin di un crimen, ta e productonan manera hekki, aparato pa haci ehercicio y renobacion di e caso di e ex minister. Pero aki atrobe, segun e abogado, OM ta robez pa cual mester pidi absolucion integral. Diabierna awor, Ministerio Publico lo reacciona riba e defensa aki.