Van Huffelen contento cu Hof a habri matrimonio pa parehanan di mesun sexo pa Aruba y Corsou

DEN HAAG – Mientras cu ainda tanto gobierno di Aruba como Corsou no a reacciona ainda riba e veredicto di Hof di diaranson riba e hecho cu a habri matrimonio pa pareha di mesun sexo riba e dos respectivo islanan, for di Hulanda, e secretaria di estado hulandes Alexandra van Huffelen si a reacciona caba y ta bisa di ta contento cu e veredicto. Asina e mandatario a declara diahuebs riba su pagina social: “Mi ta contento cu e decision cu hende di mesun sexo por casa na Aruba y Corsou” e mandatario ta cuminsa na bisa. “Ta bon cu awor tin claridad pa esnan cu kier drenta e barco matrimonial cu otro, cu den nos Reino no ta importa unda bo ta biba y ken bo ta stima.”, e mandatario a finalisa bisando. Esaki ta un dia despues cu Hof a dicta cu ta habri e matrimonio pa pareha di mesun sexo. Na Hulanda esaki ta posibel desde 2001 caba. Awor ta keda na gobiernonan di e respectivo islanan pa vocifera nan opinion y tambe dicidi si nan ta bay den casacion of no.