Wever: Prijs pa dozijn di webo produci localmente ta conoce aumento

Wever: Prijs pa dozijn di webo produci localmente ta conoce aumento

Posted on 12/6/2022 3:57 pm AST | Updated on 12/6/2022 3:58 pm AST

ORANJESTAD – Departamento di Asuntonan Economico, Comercio y Industria a base di informacion ricibi manera facturanan di importacion y gastonan relata na producion di webonan local a analisa y calcula e prijs nobo pa webo local, cu lo bira Afl. 6,65 pa un dozijn. Un aumento di Afl.1,02 pa dozijn. Asina e minister di economia a anuncia diamars, 6 di December. Mientrastanto Ee prijs nobo a drenta na vigor 5 december 2022, esta un dia prome.

Webo local ta e unico producto na Aruba pa cual ainda ta existi un proteccion di mercado. Esey ta nifica cu gobierno ta sostene y stimula produccion di webo local y ta proteha nos productornan local den forma di limitacion di e cantidad di webo importa y ta stipula prijs di webo pa proteccion di consumidor.

Aumento den prijs internacional pa puyito y cuminda di galiña a pone cu productornan di webo local a pidi pa un adaptacion di e prijs di benta na consumidor pa asina por garantisa cu nan negoshi por sigui produci. Sin un ahuste e produccion di webo local lo ta na peliger. 

Controladornan di Departamento di Asuntonan Economico lo bai controla intensivamenta supermercadonan riba cumplimento cu e prijs nobo stipula pa webo local pa evita cu tin abuso ta tuma lugar den supermercadonan. 

“Produccion local ta limita y ta keda un challenge, y pa es motibo ta importante pa stimula y yuda productornan local. Vision di gobierno ta pa tin mas produccion local pa asina como pais nos ta menos dependiente di importacion. Pandemia a siña nos con vulnerable Aruba ta y cu nos mester haci nos maximo esfuerzo pa bira menos dependiente di factornan internacional”, segun Minister Wever.

  • Powered by SETAR