ORANJESTAD Vacation Rentals Professionals of Aruba (VRPA) ta sostene pa aplica room tax pa tur vacation rentals. Asina e asociacion cu a wordo funda na aña 2021 cu e meta pa defende e beneficionan di e industria di Vacation Rental na Aruba ta bisa diabierna. Segun e asociacion, nan ta den combersacion cu diferente stakeholders pa haci inicio na un etapa di colaboracion pa yega hunto na e mihor opcionnan pa profesionalisa e sector pa cumpli cu rekisitonan regulatorio. Ultimamente varios gremio ta pone enfasis riba e deber di vacation rentals pa cumpli cu impuesto, ta hopi importante na remarca cu ora ta papia di mercado di vacation rentals profesional, significa cu tur e companianan aki ta cumpli cu nan impuesto. VRPA ta sostene pa aplica room tax pa tur vacation rentals. VRPA ta den combersacion cu Departamento di Impuesto, AHATA y A.T.A. pa propone miho practicanan den regulacion incluyendo, cobransa, acuerdonan cu AirBnB y VRBO.
Segun e asociacion, Aruba tin alrededor di poco mas di 4200 vacation rentals na Aruba, di cual mayoria ta propiedad di localnan. Nan ta sigura tambe cu e industria di Vacation Rental ta genera 470 miyon dollar den economia di Aruba directo y indirectamente. Noticiacla.com no por a verifica e informacion aki independientemente ainda si. Segun e asociacion, 25% di turista ta scoge pa keda den un Vacation Rental na Aruba y mundialmente. “E tendencia aki ta creciendo dia pa dia mas y Aruba como un destinacion turistico dinamico, no por perde e oportunidadnan economico y laboral cu Vacation Rentals ta ofrece” e asociacion ta sigui bisa. “Si Aruba no cumpli cu tendencia y demanda di e bishitante, Aruba ta core peliger di perde un bentaha competitivo compara cu otro destinacionnan caribense cu si ta sostene e industria di Vacation Rentals”. Segun e asociacion, ta importante pa yega hunto na regulacionnan cu ta solido y cu ta beneficia Aruba y e industria di Vacation Rentals.
Segun VRPA na aña 2021 Aruba a alcansa un maximo historico durante di $470 miyon dolar total den actividad economico, generando alrededor di 5600 cupo di trabou y creando oportunidadnan empresarial pa companianan chikito di mantencion, hardineria y limpiesa. Esaki tabata un recuperacion mas acelera di Aruba su stabilidad economico directo y indirecto, compara cu turismo en general, e asociacion ta sigura. “ Despues di a sinta cu varios stakeholders, por a tuma nota cu dialogo ta keda un factor importante pa comprende perspectivanan y crea caminda di inclusividad na momento cu yega na mesa pa presenta regulacionnan” e asociacion a finalisa bisando.
ORANJESTAD – Danki na un di e hotelnan all-inclusive na Aruba, nos isla ta na prome lugar di e top 10 di miho All-inclusive resorts pa famia den Caribe. Por lo menos segun e portal Travel & Leisure. Ta trata di e resort Tamarijn Aruba. Segun e articulo en cuestion, loke ta haci e diferencia den e destinacionan Caribense, ‘ta e abundancia di resortnan increibel all-inclusive’. E ta un forma perfecto pa famia por disfruta. Y ta describi tur e loke e turista por goza di dje. Mester bisa cu e resultado di e top 10 ta basa riba experiencia personal di e escritor di e portal turistico.
ORANJESTAD – Mayoria compania ta pensa cu e scarsedad di trahado na Aruba lo empeora. Asina Camara di Comercio ta raporta diaranson.
BOGOTA – Mas turista Colombiano a bay Corsou envez di Aruba. Asina presidente ehecutivo di Asociación Colombiana de Agencias de Viajes y Turismo, (ANATO), Paula Cortés Calle ta raporta segun un raportahe di e portal Colombiano El Nuevo Siglo ta raporta. Mientras cu paisnan manera Merca, Spaña, Panama y Republica Dominicano ta conta pa 69% di e Colombianonan cu ta biaha pa exterior, e pais cu mas crecemento ta Corsou cu 157% di participacion, compara cu Aruba cu tin ‘apenas’ 63%. Hasta Hulanda tin mas trafico di Colombia, na 81%. Pero ta sigui Aruba cu 47% y Panama cu 44%. Segun ANATO, e prome trimester di 2024, 1.345.687 Colombiano a biaha pa exterior, cu ta un aumento di 13%, compara cu e mesun periodo aña pasa. “E resultadonan positivo aki ta refleha e recuperacion di turismo saliente, cu ta beneficia e industria relaciona, den e area, hotel y restaurant, entre otro” Cortés Calle a finalisa bisando.
ORANJESTAD - Diabierna 19 di april 2024, Aruba Trade and Industry Association (ATIA) a tene su reuniun general di miembrecia den e sala di conferencia di ATIA.
ORANJESTAD - Den e prome kwartaal di 2024, a conta cu cifranan prometedor pa turismo como e pilar di entrada primordial y di suma importancia pa economía di Aruba. Asina e oficina di turismo di Aruba ATA, a bisa den un comunicado. A.T.A. ta pone hopi enfasis riba e modelo di “High Value-Low Impact” cu ta para pa un balans entre cuater pilar cu ta e ‘Calidad di Bida di e residente’, ‘Calidad di Experiencia di e Bishitante’, Proteccion y Preservacion di Naturalesa & Medio Ambiente, y Contribucion Economico di e Sector Turistico’. E meta ta pa sigui mantene esfuerzonan den linea segun e balans menciona, y logra aumenta e entrada proporcionalmente mas cu e volumen cu nos destinacion ta ricibi. Capacidad di carga tambe ta sigui ricibi atencion di parti di A.T.A. di diferente manera.