KPA a celebra aniversario di 4 persona cu hunto tin 40 aña como polis

MACUARIMA - Cuerpo Policial Aruba tabata di celebracion pero tambe un momento pa recorda e esfuerso y dedicacion di cuater polis cu ta den funcion y sirbiendo nos pais pa 40 aña largo.

Durante un evento ameno den presencia di famia, coleganan, amigonan y Altocomisario di Polis Sr. Ramon Arnhem a haci e reconocimento y gradicimento na  Mr. Jacinto Kelly, Mr. Rigoberto Tromp, Mr. Kenneth  Phillips y Mr. Eric Ras.

Cuater polis cu a mira Cuerpo Policial chiquito cu a cuminsa gatia 40 aña pasa durante Korps Politie Nederlandse Antillen despues a cuminsa cana y mira Status Aparte na aña 1986 y cu nos conoce awe como Korps Politie Aruba. Nan a mira e cambio, biba e experencia, mira e tempo di antes y y awo cu entrada di hobennan y tecnologia den e organisacion.

Pero locual hamas lo cambia ta e karakter y respet como persona y tambe Polis cu bo ta crea durante 40 aña di sirbi un organisacion Policial pero tambe sirbi un comunidad.

Sr. Arnhem a gradici tur e famianan di e Polis pa duna cada un di e Polisnan e sosten y pasenshi pa durante 40 aña nan por a dedica nan tempo pa cu Cuerpo Policial Aruba.