KNVB a opta pa toch no bringa FIFA den corte Deportivo pa asunto di banchi ‘OneLove’

AMSTERDAM – E directiva di futbol hulandes (KNVB) a dicidi pa toch no demanda FIFA den e tribunal internacional Deportivo CAS, riba e bistimento di banchi OneLove durante weganan di Copa Mundial 2022 na Qatar. Un total di 7 pais a dicidi inicialmente pa nan capitan bisti e banchi durante wega, como solidaridad mundial di igualdad. Pero FIFA a menasa cu tur pais cu haci esey, lo haya un carchi geel automaticamente. Inicialmente Hulanda y otro paisnan tabata dispuesto pa paga un eventual multa pa viola e regla di e banchi. Pero ora cu FIFA a bin cu e menasa di carchi geel, tur pais a dicidi di hala atras. Despues a opta pa bringa FIFA den corte. Pero esey tambe a wordo para awor. Paisnan manera Inglatera, Belgica, Alemania y Dinamarca ta algun cu tambe kier a protesta.