E di 5 edicion di e Diabetes Run & Walk tabata un gran exito

ORANJESTAD - Diadomingo mainta, 13 di november, tur 1250 di e participante tabata presente pa e Walk & Run, cumpliendo e meta di participante cu kier a alcansa pa e evento. Ademas di esaki, a logra recauda un total di AWG. 15,000 pa Fundacion Diabetes Aruba pa nan programa di prevencion y maneho di diabetes: PRISMA. PRISMA ta un programa en especial pa personan cu diabetes tipo 2 cu kier tuma control di nan salud, crea un miho maneho di nan diabetes y preveni cualkier otro complicacion di salud. 

E Diabetes Run & Walk ta un gran evento cu ta conmemora e Dia Mundial di Diabetes, cu ta tuma lugar dia 14 di november tur aña. Ademas di participa den e careda, tabata tin ambiente di musica, cuminda saludabel di One Healthy You y ceremonia di premio. 

Un palabra di agradecimiento ta bai en especial na Aruba Aloe kende, hunto cu Botica di Servicio, tabata e main sponsornan di e evento aki, y tambe na Subway como main sponsor di e kids run. 

Un danki tambe ta bai na cada un di e boluntarionan cu a saca di nan tempo pa yuda prepara pa e evento y tambe kende tabata presente durante e evento. Y sin lubida tur e participante cu a yuda contribui na e gran causa aki pa e conscientisacion, prevencion y maneho di diabetes, un problema grandi cu nos Isla ta maneha cune.