ORANJESTAD – Faltando solamente algun dia pa duna inicio na Crossing for Prevention, mester bisa cu tur cos ta na su luga, principalmente e estado mental y fisico di Deaxo Croes. Deaxo ta landa diasabra awo, 19 di november 2022 for di Boneiro pa Corsou den un hazaña cu e meta di recauda fondo pa e fundacionnan cu ta traha riba prevencion di cancer.
Mientras cu e accion aki ta dedica na tur esunnan cu cancer a cobra nan bida, esunnan luchando na e momento aki y e sobrevivientenan; den un buelta di destino, el a caba di bira mas personal ainda pa Deaxo. Algun dia atras, su tanta Mayrin a caba di haya diagostico di cancer. Tras e noticia, inmediatamente Deaxo a coy ainda mas curashi y determinacion y a bisa cu ta dedica e hazaña di Crossing for Prevention na su tanta.
Adicionalmente, Deaxo a continua durante e ultimo simannan aki entrenando fuertemente tur dia y durante gran parti di dia, guia pa e conseho profesional di su ekipo cu ta inclui dokter y nutricionista. Mentalmente tambe Deaxo ta sintie cla pa afronta e reto aki y ta den un estado masha positivo, gradiciendo un y tur pa e sosten y reaccionnan positivo cu e ta ricibi di asina tanto hende.
Pa loke ta trata logistica, tur cos ta na su luga tambe, unda cu e henter e team a sali diaranson dia 16 di november for di Aruba rumbo pa Boneiro caminda Deaxo lo papia cu prensa pa yuda hiba e mensahe di importancia pa aporta na e causa. Varios ta e yate cu a sali for di Aruba cu kayakers, landado, personal medico y tambe di produccion audiovisual pa capta tur detaye di e gran reto. E ekipo ta contento di por confirma cu, a pesar di e yobida di ultimo dianan, tur cos ta indica cu lo conta cu un bon situacion di tempo pa dia di e landamento.
Loke ta sumamente importante pa en berdad Crossing for Prevention bira un exito absoluto, ta pa pueblonan di Aruba, Boneiro y Corsou aporta cu nan contribucion monetario. Manera ta conoci, esey ta posibel caba a traves di e pagina web www.crossingforprevention.com como tambe a traves di e cuenta di banco individual di e fundacionnnan CORESA (Aruba), Stichting Kanker Fonds (Bonaire) y Fundacion Prevenshon (Corsou).
Tur informacion necesario ta disponibel eynan, como tambe riba e cuenta di Facebook Crossing for Prevention. Tin un cantidad limita di flanel (jerseys) cu, a traves di su compra, tambe ta contribui na recauda fondo. Tur dia tin mas hende sufriendo door di cancer, ta imperativo pa nos tur contribui na alivia nan sufrimento y conscientisa riba prevencion.
BARCELONA – E strea internacional di tennis professional Rafael Nadal a anuncia cu esaki ta su ultimo aña professional. “ Mi ta considera esaki como mi ultimo aña y mi kier disfruta di cada momento” Nadal a bisa dialuna durante un conferencia di prensa na Barcelona. E la anuncia su participacion diamars awor na e torneo ATP na Barcelona. Ta su prome participacion despues di a retira tres luna pasa di e torneo na Australia. E ganador di 22 titulo grandslam, a dicidi ultimo momento pa participa e siman aki. E tenista di 37 aña di edad mester a sacrifica varios torneo debi na su condicion fisico cu no tabata optimal. Ultimo tempo e ta sufriendo di basta lesion y a indica aña pasa caba cu esaki por ta su ultio aña. Awe e la confirma cu esaki enberdad ta su ultimo aña hungando tennis professional.
SAVANETA – Un cantidad record di persona ta den Ronde van Aruba (RVA) awe. Segun informacion di e portal 297Sports, un total di 726 coredor ta subi caminda, cual por cierto ta un record. Tur e lunanan di preparacion lo keda demostra awe riba caminda unda e demas participantenan lo duna un show di coremento riba e careteranan di nos dushi isla di Aruba. Lo tin un total di 16 coredor single e aña aki, 57 duo teams cual ta e cantidad mas grandi den historia di RVA. Por ultimo e 149 estafette lo ta den e gruponan di 4 relay, pues 596 persona lo core e 72km rond di nos isla. E fiebre di Ronde van Aruba ya a wordo sinti y lo bay ta grandi awe full rond di nos isla cu hopi mirones canto di caminda. Tin varios happening prepara na e diferente post.
ORANJESTAD - Diabierna atardi den un esfera ameno, Minister Endy Croes a ricibi nos Seleccion di Landamento y Seleccion di Landamento Artistico den e VIP room di Aeropuerto Internacional Reina Beatrix. Manera ta conoci, siman pasa nos atletanan a competi den Carifta Aquatics Championships 2024 cu a tuma luga na Nassau, Bahamas y Fort Lauderdale, Florida. Carifta ta e competencia di e mihonan di Caribe. E aña aki alrededor di 400 atleta di 21 pais a participa. Famia y amistad tabata ansioso sperando e yegada di nos atletanan. E hobennan a conkista un total di 54 medaya den dos diferente disciplina acuatico: landamento y landamento artistico. Den e disciplina di landamento a logra 30 medaya y landamento artistico 24 medaya. Pais Aruba a keda na di 7 luga den 21 pais. Den nomber di Gobierno di Aruba, Minister Endy Croes a felicita e atletanan cu nan excelente prestacion den Carifta. Alabes, a gradici e atletanan pa carga nomber di Aruba y laga nos pais briya riba plataforma internacional.
NEW YORK — E percentahe di hungadornan internacional hungando baseball professional na Merca, a baha te na 27.8% cu ta e nivel di mas abou desde 2016. Aworaki tin 264 hungador di 19 pais, entre e 949 hungadornan activo total ora cu e temporada 2024 a habri siman pasa. E pais internacional cu tin mas hungador na Merca, ta Republica Dominicano cu 108 hungador, sigui pa Venezuela cu 58 sigui pa Cuba cu 18. Corsou tin 4 mientras cu Aruba tin 1 (oficialmente) cu ta Xander Bogaerts. Actualmente e tin un hungador riba ‘standby’ cu Atlanta Braves, esta Chadwick Tromp. Pa loke ta e ekipo cu tin mas hungador internacional, Houston Astros ta lidera e grupo aki cu 16 hungador, sigui pa San Diego cu 15, Boston cu 14, Miami cu 14 y Cleveland cu 12.
ORANJESTAD – E conocido entrenador Hulandes Arjan van der Laan ta bira e entrenador nobo di ARuba pa e seleccion di futbol damas di Aruba. E ta reemplasa Veron Albertz. Van der Laan tabata entrenador di e seleccion nacional di futbol di damas Hulanda.
ORANJESTAD - Aruba International Regatta lo tuma luga riba diabierna 28 di juni te cu 30 di juni na Surfside Beach. Un evento cu sigur hopi amante di lama y di nabegacion ta anticipa, sigui pa dos dia di careda riba diasabra 29 di juni cual lo bira e prome dia, y diadomingo 30 di juni e di dos dia di careda.