CAFt: Gobierno no tin obligacion legal pa atrobe pidi CAFt revisa presupuesto!

ORANJESTAD – “ No tin un obligacion legal pa entrega un concepto di presupuesto di nobo (pa CAFT revisa:Red), riba cual a duna conseho caba”. Asina e colegio di supervision financiero CAFt a confirma na noticiacla dialuna. A haci e pregunta basa riba e discusion cu a surgi den Parlamento, cu si awor cu a cambia BTW pa BBO aumenta, mester bay CAFt un biaha mas prome cu Parlamento aproba esaki. CAFt pues a confirma cu e version di gobierno, ta berdad. “ Ta un prerogativo di gobierno di Aruba. Si gobierno kier presenta un concepto ‘coregi’ di presupuesto na CAFt, CAFT lo conseha riba esaki dentro di e termino legal” e colegio a finalisa bisando.   

DEBACLE PARLAMENTARIO

Tabata net prome cu Parlamento tabata cla pa cuminsa trata presupuesto 2023 siman pasa, oposicion a cuminsa cuestiona esaki, indicand cu segun ley di LAFt, si tin cambio den e presupuesto, mester bolbe laga CAFt controla esaki prome cu Parlamento por trata esaki. Gobierno mesora a sigura cu esaki no ta necesario pasobra e ta un prerogativo di Gobierno. 

A PUNTRA CAFt

Pa buena marcha noticiacla a puntra CAFt kico ta e punto aki, unda cu awe e colegio a contesta e portal aki cual contesta a keda poni den e raportahe aki na comienso.