Aruba a yama Sinterklaas y su pietnan bon bini atrobe despues di 2 aña

ORANJESTAD Diadomingo mainta minister Maduro di Cultura a yama Sinterklaas y su Pietnan bonbini na waf di Harbour Arena. Sinterklaas a sorprende e minister cu e   buki 'Academia di Piet' den cual Sinterklaas ta splica tur e cambionan cu tin cu e celebracion di Sinterklaas y su Pietnan di color. Cada color tin un bunita nificacion y pesey e biaha aki Sinterklaas ta desea pa tur mucha haya sa di nan. Despues di e yamada di bonbini, Sinterklaas y tur su Pietnan a bay den un caravana compaña pa e coro di 'Muchanan Sabi' di Edselyne Figaroa, hunto cu Quality brassband y nos Reinanan direccion pa Plaza Padu unda tabata tin un fiesta prepara pa e muchanan disfruta di e yegada di Sinterklaas y su Pietnan na Aruba. E yegada di Sinterklaas a wordo   ricibi pa un cantidad grandi di muchanan den Harbour Arena, riba e ruta di e parada y tambe riba Plaza Padu.