- Bucuti & Tara Beach Resort a Celebra Housekeeping Week cu Premionan y Reconocementonan Special
- KNVB: Wega suspendi entre Ajax y Feyenoord na Hulanda, ta sigui diaranson awor
- Gobierno a inicia siman di accion pa cu metanan di desaroyo sostenible (SDG's)
- KLM a yega na acuerdo cu pilotonan, evitando un welga awe
- SKOA a celebra nan acreditacion oficial di e programa Erasmus+
Fiscal: Caso Avestruz ta trata un grupito di persona cu a enrikese nan mes lihe cu ayudo di Sevinger
ORANJESTAD – Caso penal cu a haya e nomber Avestruz, ta trata un grupo chikito di persona cu a keda privilegia cu hayamento di tereno erfpacht, y a enrikese nan mes grandemente den un tempo hopi lihe, cu ayudo di ex minister Benny Sevinger. Esey ta un synopsis chikito di fiscal mr Rethmeier diahuebs den Corte durante e ‘rekisitorio’, esta e presentacion di echos segun Ministerio Publico.
HAYA COS FACIL
“Nan tabata haya tur loke nan tabata pidi” e fiscal ta sigui bisa, refiriendo na peticion pa tereno erfpacht. ”Tereno erfpacht ta wordo otorga riba un papel, apenas algun dia despues di a haci e peticion. E unico cu nan mester haci pa esey, ta entrega un papel na oficina di e ex minister Sevinger. E Sevinger ey tabata percura despues personalmente pa e peticionan aki wordo atendi cu urgencia, y pasa door di e proceso sin ningun problema”. Entre esnan cu tabata pidi e terenonan, lo tabatin te hasta personanan cu tabata traha directamente pa Sevinger como ambtenaar riba su ministerio, segun e fiscal. Ta trata di miyones cu e varios sospechosonan a sa di gana cu e practicanan aki. “Nos como Ministerio Publico a trata poco caso unda cu hendenan tabata bira rico asina lihe, cu asina poco esfuerso y poco risico di negoshi”.
SOSPECHOSONAN SPECIFICO
E fiscal e ora a sigui pa ilustra algun di e casonan specifico. E ta cuminsa cu e sospechoso Sussebeek cu a bende via un di su NV nan, su option di tereno ricibi ‘di su bon amigo Sevinger’, dentro di algun dia. “Kico e mester a haci pa esey? Yena algun carta y formulario. Nada mas. Pa esaki Sussebeek ta ricibi 2.4 miyon florin di e cumprado” e fiscal ta sigui bisa. Placa cu e sospechoso lo a pone riba su cuenta afo. Ministerio Publico a sigura cu a confisca e cuenta y ta bay tuma e placa ey pa e bin na beneficio di Aruba. E fiscal ta sigui cu sospechoso Mansur cu lo a rcibi mas di 1.3 miyon dollar. Sospechoso Werleman casi un miyon dollar. Y su pareha, sospechoso Nuñez casi 800 mil dollar. Esaki pa benta di accion di un negoshi cu segun fiscal, nunca e la haci algo cune, fuera di regla algun firma di Sevinger. Pa loke ta e sospechoso Arends, esaki lo a ricibi 750 mil florin pa benta di dos NV bashi. Banda di esey tin algun sospechoso, trahando como desaroyado, cu lo a haya nan peticion pa tereno trata hopi liher, door di Sevinger personalmente. Esaki segun e fiscal.
PRIJS
E investigacion segun e fiscal, a mustra cu aceso pa Sevinger tabatin un prijs si. E ta papia di decenas di miles di florin na regalo pa Sevinger. Entre nan, un cuenta di bebida di 8000 dollar pa fiesta quinceniera di su yiu muher, den Holiday Inn Hotel, paga door di doño di e hotel (Lowenstein:Red). Tambe ta papia di renobacion completo di e cas di Sevinger, na balor di 75 mil florin. Tambe lo a instala un hardin completamente nobo pa su cas. Y un gym nobo lo a wordo paga pe. Y pa no papia mes di un hekwerk traha riba midi, cu lo a bin for di Merca pa Sevinger. Y finalmente, e famoso envelop cu mas di 200 mil florin cu lo a wordo entrega na su cas. Asina e fiscal ta sigui bisa. E fiscal, contrario na refutacion di abogado y sospechosonan, si ta duna balor na declaracion di un testigo, cu lo tabata responsabel pa trece e placa pa Sevinger.
STRUCTURA FALSO
Via varios structura dudoso di NV nan, lo a haci como si fuera ta pa desaroya tereno, e varios sospechosonan lo tabata pidi pa e proyecto cu e terenonan adkeri. Pero e realidad, segun e fiscal, ta cu tabata percura pa unabez adkeri e tereno(nan), bende nan mesora y pa hopi hopi placa. Un benta cu tabata tuma lugar na partidonan (cumprado:Red) cu no tabatin, loke nan (e sospechosonan:Red) si tabatin, esta entrada na e minister Sevinger. E grupo aki, a wordo parti den dos, esta un grupo di desaroyador conoci y exitoso, cu pa medio di regalo y pago pa tene Sevinger como ‘amigo’. Entre sospechosonan menciona, ta principalmentePristine Estates NV, y sospechosonan Harms y Biemans (pa cual despues a pidi absolvacion integral, esta Biemans). E partidonan aki realmente a desaroya proyectonan conforme e peticionnan haci. Y, tin e otro grupo di persona, den circulo chikito di Sevinger, cu casi no tabatin nada di haber cu desaroyo di proyecto, realmente. Pues segun e fiscal, ta considera nan tur un farce. Diripiente ora cu Sevinger a bira minister, e grupo aki lo a bin dilanti como supuesto desaroyador.
E fiscal ta describi nan relacion di trabou tambe anteriormente specificamente. Entre nan Sussebeek, cu tabata traha como consehero di Sevinger, full time como ambtenaar, pero cu realmente lo tabata traha apenas 3 ora pa siman. Sospechoso Arends a keda describe como un ex DJ di radio y un bendedo di rifa. Un otro, Mansur, procedente for di un famia rico, cu realmente lo no tabatin ningun experiencia pa desaroya proyecto. Atrobe, tur esaki segun Ministerio Publico cu a presenta esaki den e rekisitorio. Y finalmente, un ex parlamentario, miembro di partido di Sevinger y ex consehero, esta sospechoso Werleman y su pareha Nuñez. Segun Fiscal, e ultimo grupo aki a crea un asina yama smokescreen pa por a sconde nan trabounan ilicito realmente. Algo cu segun e fiscal, no a logra danki na e ‘bon’ trabou di Landsrecherche. Loke si a logra nan, tabata cu nan lo a haya, via manera illegal, terenonan erfpacht di hopi balor via Sevinger. A logra esaki supuestamente via soborno di e minister, y estafa di pais Aruba, combina cu falsificacion di firma. Sospechosonan Abath y Every lo a yuda cu esaki.
Y finalmente, malversacion di fondo di e Fundacion Curason Berde, lanta pa fondonan pa campaña politico di Sevinger. For di ey, Sevinger lo a coi 11 mil florin pa cumpra e.o. pasashi pa e y su casa pa un evento den exterior. Ta continua…
Huez a kita cachonan peligroso di nan doñonan, y multa nan 1000 florin
ORANJESTAD – Corte diabierna atardi a trata un caso interesante, cu a resulta den un decision di huez pa kita dos cacho peligroso di nan doñonan, y a multa nan cada uno 500 florin, como castigo pa no a actua como doño responsabel di nan respectivo cachonan. Ministerio Publico a informa diabierna cu a dicidi pa trece e caso dilanti mirando e embergadura y impacto cu esaki tin riba comunidad, unda cu e keho mas grandi na Aruba aworaki, ta molester di cachonan di caya na Aruba.
Huez a bolbe rechasa libertad pa polis Vos y ta trata caso comienso di December awor
ORANJESTAD – Bou di lagrimas e agente policial R. Vos a tende di Corte diahuebs atardi, cu e mester keda cera na KIA te ora cu su caso bin dilanti dia 8 di December proximo. Huez despues di a tende tanto argumentacion di fiscal como abogado Defensor, a rechasa e peticion pa suspende su detencion te e momento ey. Vos ta sospechoso di a proveni e informacion piolicial na e periodistanan y tambe di traficacion di persona. E ta cera ya 6 luna, y awor ta confirma cu e lo keda cera pa 3 luna mas, cu ta bira un total di 9 luna, desde cu e la cay cera na maart di e aña aki.
Corte a sentencia ex hefe cahero di DIMP na 3 aña di prizon pa malversacion
ORANJESTAD – Corte diahuebs a sentencia un ex funcionario di Departamento di Impuesto, DIMP, Filomena Maduro na 3 aña di prizon, di cual 1 aña ta condicional. Huez a bisa diahuebs cu e ta haya proba cu Maduro a comete e actonan aki y cu e ta un sla formal pa tanto e departamento como e coleganan trahado. Ademas e ta viola e confiansa cu ta hinca den e trahado y cu pueblo mester por confia den un persona asina. Na final huez a dicidi cu ta cobra Maduro e suma cu e la coi di un forma illegal di e departamento pero cu esaki lo tuma lugar durante un caso fin di October proximo. Maduro tin 14 dia pa apela e sentencia si e no ta di acuerdo.
Ministerio Publico a yega na acuerdo cu sospechoso Croes den caso Flamingo
ORANJESTAD - Ministerio Publico a informa diahuebs merdia cu recientemente e la cera un acuerdo di transaccion den e caso Flamingo contra e sospechoso Humprey Anthony Croes pa un suma di Afl. 25.000. Tabata na Maart di 2022 cu e la keda deteni como e di dos sospechoso den e caso aki.
OM: Accion di Afpakteam na aeropuerto ayera, tabata pa manda ‘señal’ cu ta control constant!
ORANJESTAD – E accion cu Ministerio Publico a raporta ayera di afpakteam na Aeropuerto Reina Beatrix, ta algo cu nan lo tene regularmente di awor en Adelante. Asina vocero di Ministerio Publico Ann Angela a clarifica pa Noticiacla. Ayera a anuncia cu a controla riba tur buelo pa Republica Dominicana. Noticiacla a puntra pakico e aeroliña ey y kico e resultado tabata. “No a detene ningun hende y tampoco a confisca placa” Angela a sigura e portal aki. “E tabata mas tanto un señal” y e motibo pakico a cuminsa cu e aeroliña ey tambe tabatin su motibo. “Dicon a cuminza ey? E ta un escogencia cu a wordo haci. E intencion ta pa Afpakteam regularmente tene e tipo di accionnan aki di awor pa dilanti na airport”, Angela a finalisa bisando.
Corte: Ta trata apelacion di caso Avestruz integralmente na mei di 2024
ORANJESTAD – Corte di apelacion a reserva e di dos siman di luna di mei 2024 pa trata e caso di apelacion Avestruz. Asina e tres hueznan a informa e abogadonan di e 7 sospechosonan durante e asina yama regiezitting diamars atardi. cu ta wordo scucha un biaha mas den apelacion. Ta trata di e sospechosonan Benny Sevinger, Pieter Sussebeek, Carlo Mansur Jr, Maria Leoncita Arends, Ninuska Nuñez, Edgar (Gabby) Werleman y Curt Harms. Tur sea a apela parti di nan sentencia den e prome caso, of Ministerio Publico a apela nan sentencia. Specificamente, cuater sospechoso a apela parti di nan sentencia mientras cu Ministerio Publico a apela sentencia di tres sospechoso.
Follow NoticiaCla
