Hues a cuestiona hotelero di e forma di pidi y haya tereno pa su hotel

ORANJESTAD – Awe corte a trata e ultimo sospechoso ‘nobo’ den e caso penal Avestruz, esta e conocido hotelero E. Biemans. Den corte a keda estableci cu Biemans ta keto bay propietario di e hotel Bucuti. Su envolvimento den e caso ta e forma cu e lo a pidi y haya tereno erfpacht pa expansion pa su proyecto hotelero durante e periodo cu Benny Sevinger tabata minister di infrastructura.

E ACUSACION

Hues a confronta Biemans cu e hecho cu na 2012 e la haci su prome peticion pa tereno erfpacht. Biemans a splica hues e momento ey cu tabata na 2011 cu e la haci tres peticion pa tereno y na 2012 atrobe. E la manda carta pa DIP y a papia di por lo menos 4 carta total manda, di cual tur copia e la manda pa e minister en cuestion e tempo ey, esta Sevinger. Tin un carta di 10 di juli 2012 dirigi na Abath, cu un copia na e minister. Den e carta aki e ta gradici Abath pa e combersacion amplio di erfpacht cual transaccion a tuma lugar e mesun dia esta 10 di juli 2012. 

AMPLIACION DI TERENO

Biemans a sigui conta hues den corte cu e la purba haya ampliacion di tereno erfpacht pa su propiedad hotelero Bucuti. E la splica hues cu e conoce Abath pa 35 aña y a pidie pa e tereno. E intencion tabata pa basha e restaurant e tempo ey abou y inverti 10 miyon pa traha un restaurant nobo. E la remarca tambe cu e tempo ey, tabatin mas hotel den e situacion di expacion. Entre nan a haci mencion di tanto Manchebo Hotel y Costa Linda Hotel cu tabata den un mesun situacion cu Bucuti. Ademas e la splica cu na 2016 Manchebo a haya ampliacion di tereno erfpacht y Costa Linda for di 2011. E ta sigui conta cu finalmente na 2017 Bucuti tambe a haya aprobacion pa su ampliacion. Asina mes, a surgi contratiempo debi cu a surgi problema cu midimento di tereno door di Kadaster. Tempo a pasa y dado momento a cera e e hotel pa 5 luna, y despues na 2013 a habri e restaurant. Biemans a splica hues cu nunca e la pensa di haya problema asina. 

HUES TA CITA IREGULARIDAD

Hues a confronta Biemans e ora cu algun ‘iregularidad’ den su proceso di haya tereno. E ta splica Biemans cu e la haya aprobacion di e tereno te na 2017, pero cu ya a construi for di 2013 esta prome cu a haya aprobacion di e erfpacht. Aki Biemans a purba clarifica cu tabata dia 23 di juli 2013 cu e la haya carta di e director di DIP e tempo ey, awor sospechoso F. Abath, cu e por a cuminsa construi numa. Hues a remarca e ora cu den e carta enberdad ta bisa cu di e acuerdo cu e aprobacion di minister di dia 16 di juli 2013, no tin problema pa ehecuta e proyecto. Hues a sigui bisa cu tin un carta di Abath, fecha dia 13 di juli 2013 cu e la manda pa minister Sevinger e tempo ey, pa aproba e peticion pa expansion di tereno. Tambe e la referi na e posibilidad cu lo tabatin obhecion di e comision di beachnan.  Aki Abath a sigui pa splica hues con a atende cu Manchecho prome pa haya tereno pa expande pa asina por keda cla cu e temporada halto di turismo. Abath a sigui splica cu a haci mesco cu Bucuti, y ta despues enberdad nan a haya e erfpacht oficial. 

PAGONAN RICIBI

Dado momento hues a splica cu Abath lo a haya 8 pago. Entre nan tin un pago di 55 mil florin total na maart di 2012. A resulta cu esaki tabata e placa pa taxacion pa e hotel. Tambe tin pagonan haci di 20 mil florin, pero aki Abath a sigura cu e no sa di e pagonan ey. Loke si e la confirma, ta cu el a haya placa di mas y cu esaki e la debolbe esaki na Biemans. Biemans e ora a sigui cu e splicacion con tur esaki a sosode pa trece claridad. Biemans a purba splica hues e ora cu e la pidi Abath pa haci dos taxacion, cu ta uno pa Bucuti y uno pa un cas na Malmok. Ademas e la confirma cu e la duna Abath un ‘bonus’ di 20 mil florin pa su bon trabou. Aki hues a splica cu tur esaki tabata den e mesun temporada cu a pidi pa e erfpacht sugeriendo pues cu por interpreta esaki di varios forma. A sigui menciona pagonan ricibi y ta papia di 2013, 2014 y 2015 cu tabatin pagonan haci. Segun Biemans, e la haci un adelanto di pago na Abath pa e taxacionan, pero cu na 2015 Abath no a haci taxacion. Ta awo, relaciona cu e caso, e la ripara esey, e la sigui bisa. Segun Biemans, Abath a reacciona cu Biemans a paga di mas, y e la bisa cu e no tabata kier e paga e placa bek, pasoba cu Abath tin mas trabou pa haci. E suma en cuestion aki tabata di 20 mil florin. Despues Biemans a bisa cu Abath na 2018 a haci 3 taxacion y e ta considera esey como pago di loke a haya di mas. 

HUES NA SEVINGER

Aki hues a dirigi su mes na Sevinger y puntre si e tabata sa cu Abath ‘tabata traha pa Biemans’. Sevinger a nenga esey y bisa cu no. Ademas hues a puntra Sevinger e ora si e ta haya cu esey lo influencia e trabou di Abath pa cu e peticion di tereno. Aki Sevinger a sigura cu e conoce Abath como un professional cu ta haci su trabou manera mester ta. 

FISCAL 

Fiscal a drenta den e combersacion y a splica e ora cu e ta calcula cu Abath lo a haya 200 mil florin for di Biemans. Biemans a splica cu taxacion di un hotel ta hopi trabou, y pa cual mester busca y paga expertonan pa yuda calcula, machinan y otro aspectonan di e hotel, splicando e sumanan posiblemente. Na final, Biemans a bisa hues cu e tin 52 aña biba na Aruba y ta duele masha cu awor e ta hay’e den un caso asina.