Sevinger a yora den corte, pa con caso Avestruz a afecta su famia

ORANJESTAD – Durante e ultimo dia cu hues a confronta e ultimo tres sospechosonan den e caso penal Avestruz, dos a bira emocional y hasta yora, debi na e impacto cu e caso tabatin riba nan te awor. Entre nan tin ex minister Benny Sevinger cu a no a contene su mes y a splica hues e hues e impacto cu e caso tin riba dje te awor. Mes momento fiscal a mustra cu ta reduci un cargo contra Sevinger, di cu a malversa 2 miyon florin pero no a duna mucho splicacion pakico. 

REDUCI CARGO

Den e caso awe mainta, hues a confronta Sevinger cu e acusacion di malversacion di 11 mil florin. Sevinger a splica hues aki cu enberdad e la tuma 11 mil florin di e fundacion Curazon Berde, como un adelanto. E la sigui splica cu for di esaki, a paga huur, awa y coriente di e fundacion, y cu e fundacion lo a pague bek. Ademas Sevinger a splica cu e la haya invitacion pa un reunion den exterior pa cual su señora tambe a keda invita. Tambe e la admiti di a usa e placa pa bay e biahe ey. E ta sigui splica cu den 2009 y 2010 e la paga huur den cash henter aña y cu ta un biaha so e fundacion a paga huur. Ademas tin cheques cu e fundacion lo a traha pero cu nunca no a cobra nan. Te aki a yega cu e parti di confrontacion, ya cu mucho mas no a keda pa trata. 

BENNY A YORA

Manera cu e hues a haci cu tur otro sospechoso, na final di nan momento, ta puntra nan pa nan situacion personal, pa e haya un idea con nan ta para, kico nan ta haciendo y con e caso a afecta nan. Aki ta unda cu Benny a bira emocional y yora, ora cu e la splica hues con hopi e caso aki a ta afectando su persona y su famia. E ta considera e caso aki uno di puro persecucion personal, pa cual su yiu muher no  por a haya trabou y mester a bay Hulanda cu ne. Diahuebs ta turno di fiscal pa presenta e cargonan y pidi e castigo pa entre otro Benny Sevinger.