Gobierno a yama Elmar, WEB y Utiliies ‘op het matje’ pa blackout

ORANJESTAD - Gobierno diamars merdia a yama Elmar, WEB y Utiliies ‘op het matje’ pa blackout. Op het matje ta un dicho na hulandes cu ta nifica ‘yama pa responsabilisa bo mes pa algo’, y of ‘jama e persona(nan) pa reclama nan di algo cu nan a haci malo’. Nan tabata kier sa kico tur a pasa y porta mas importante, ki por haci pa e no sosode mas. E reunion urgente tabata entre minister president Wever, minister di energia Croes y gerentenan di e companianan menciona.

SPLICACION Y PALABRACION 

Segun e comunicado, durante e reunion cada compania a duna splicacion di e incidentenan y a haci palabracion pa percura cu comunidad ta ricibi e servicio debido. 

SITUACION

Wever a splica cu WEB actualmente ta pasando den un periodo di transicion. Den cuadro di esaki ta cambiando di ekipo bieu pa ekipo nobo cual ta encera un di e proyectonan mas grandi cu WEB a yega di atende cu ne. “Di parti di Gobierno ta compronde cu esaki ta bin cu algun riesgo, sinembargo cinco black out den cinco luna di tempo ta algo cu tin cu atende cu ne”. Durante di e reunion a trata ki plan tin na luga pa evita cu durante resto di e periodo di transicion lo sigui tin eventualidadnan y black out. Mester percura pa e black out nan aki no tuma luga mas,  pasobra e ta afecta comercio, turismo y ciudadanonan. 

UTILITIES

Director di Utilities Aruba Anthony Rojer a expresa cu e tema di e reunion tabata uno serio den cual a delibera e ultimo incidentenan y explora solucionnan pa evita cu tin ripitacion. ‘Nos lo sigui cu miras pa futuro pa cumpli cu e metanan di e “energy policy y energy security” cu ta nos prioridad aki na Aruba.’ Pues mucho promesa no tabatin ey. 

WEB 

Director di WEB Alfredo Koolman a comparti e perspectiva di WEB y a provee splicacion di kico ta bay haci siguientemente pa evita e situacion di diferente black out aunke no a splica publicamente kico e detayes ta. Y esey ta netamente loke e problema ta. ‘E tabata un bon reunion, riba nivel den forma cu ta haya solucion pa nos Pais’ ta e unico cu a bisa, pero no a bay den detayes. 

ELMAR 

Director di ElmarAnthony Irausquin a elabora riba e diferente incidentenan cu tabatin despues di e black out, cu Elmar a atende cu ne, a trata plannan pa den futuro y kico lo bay haci proximamente pa loke ta trata e maneho di energia sostenibel di Gobierno. ‘E reunion a bay bon y awo ta keda na nos como compania estatal pa sigui brinda e servicio cu comunidad ta spera.’

GLENBERT CROES

Minister di   Energia Glenbert Croes durante e reunion a enfatisa cu e situacion ta inacceptabel den e mundo moderno di awendia, na un pais unda cu a inverti tanto placa y cu e nivel di profesionalnan cu tin na WEB. E situacion di 5 blackout den 5 luna no por sigui y esey ta e instruccion cu Gobierno a duna na e empresanan di utilidad. Ademas como Minister encarga cu energia, Minister Croes a haci peticion pa un investigacion independiente tuma lugar den nomber di Gobierno di Aruba, pa verifica kico a pasa y pa wak si ta tumando e accionnan necesario pa impedi e black out nan di tuma luga. 

Por ultimo, Prome Minister Wever - Croes a bisa cu durante di e reunion a atende varios otro tema cu ta importante pa aclaria den e trayecto aki, entre otro e metanan cu Gobierno tin pa por cumpli cu e transicion pa energia mas sostenibel, mas limpi, y mas confiabel. Cu lo conduci na prijsnan di awa y coriente mas abou y cu ta cumpli cu e palabracionnan haci internacionalmente riba e tereno aki.