Croes: Ta planea pa reuni awor cu minister nobo di energia di Ecuador

ORANJESTAD – Minister di energia di Aruba Glenbert Croes no tin intencion di ‘laga cay’ despues cu e la haye den un situacion ‘fastioso’ ora cu colega minister di Energia di Ecuador a haye ta retira pura recientemente. A pensa cu esey tabata e fin di e deal ey, y e mes a bisa cu lo sigui traha riba dje, pero pensando cu lo busca otro cos. Awor ta resulta cu ta cu Ecuador mes lo sigui, solamente cu e otro minister. 

MINISTER NOBO

E intencion awor ta segun e minister pa reuni awor cu e minister nobo di energia di Ecuador Fernando Santos. Asina e mandatario a declara diamars den un comunicado. Esey ta indica cu e mandatario ta determina pa sigui cu e plan mes di Ecuador pa logra haya heavy fuel oil mas barata. 

MINISTER NOBO

Segun e mandatario, “el a ricibi e bon noticia cu Embahada Hulandes lo bay tin un reunion e luna aki cu e Minister nobo di Ecuador, sr Santos”. Y despues e mandatario a splica cu e loke e la palabra cu e ex minister, lo ta e mesun plan pa cu e minister aki. “E oportunidad aki ta di gran beneficio pa pais Aruba ya cu si cumpra e crudo aki directamente di Ecuador, eliminando asina e dos intermediarionan, lo spaar 5 dollar riba cada bari. Den un periodo di 30 luna lo ta un total di 4.2 miyon bari ekivalente na mas di 21 miyon dollar. Esaki ta hopi placa pa scapa nos comunidad, nos economia y nos pueblo” e mandatario a bisa, locual ta e mesun cos cu e la anuncia anteriormente.

PARLAMENTO

Tabata dialuna durante su presentacion pa cu e presupuesto 2023, cu e la tuma e oportunidad pa adresa e comentarionan cu tin actualmente relaciona cu su biahe pa Ecuador y e retiro di e minister Ecuatoriano anterior, cu ta esun cu a reuni cu su persona riba e posibilidad pa Aruba cumpra “heavy fuel oil” directamente for di Ecuador.  E mandatario a lamenta cu oposicion ta bagatelisa e esfuersonan haci pa gobierno en conexion cu bahamento di prijs di awa y coriente. Segun Croes, oposicion ta burla di e biahe pa Ecuador. “Sikiera na Ecuador, un minister den problema ta retira. Lamentablemenete esaki no ta e caso na Aruba. Manera por a nota den medionan di comunicacion, ministernan di AVP cu a horta y haci negoshinan ilicito ta wordo recompensa manteniendo nan den funcion.” Minister Croes a expresa.