Uso di ‘magia’ pa haya placa pa paga pa tereno, a bira discusion entre fiscal y sospechoso Mansur

ORANJESTAD – Durante tratamento di e caso penal Avestruz, hues y fiscal a confronta un di e sospechosonan C. Mansur pa e hecho cu e lo a pidi opcion pa un tereno pa desaroya un edificio, pero na caminda e no por a ni paga e placa pa e opcion. Durante e confrontacion, e fiscal a cuestiona con di no tin placa, despues di un yamada di Werleman reclamando cu Mansur ainda no a paga,   e sospechoso a alega cu den forma di magia, e la percura pa pa haya placa. Aki fiscal a confronte cu e declaracion ey, y despues Mansur a ‘recapacita’, y bisa finalmente cu e la yama su tata pa e placa. “Pues e arte di magia, tabata e yamada telefonico pa bo famia”, e fiscal a cuestiona Mansur. Aki a surgi un discusion riba e uso di e termino ‘magia (toveren), cu a conduci cu fiscal a menasa di laga e griffier lesa e texto, pa prueba cu ta Mansur ta esun cu a inicialmente a usa e palabra ‘magia’. Despues e hues a confronta Mansur cu e hecho cu mientras cu e tabatin problema cu placa, e la sa di saca un ‘bunita’ ganashi  di mas di un miyon dollar for di e benta di e companianan cu e tabata forma parti di dje anteriormente. 

TERENO SIN PLACA

Tabata ora cu hues inicialmente a cuestiona con Mansur por a pidi pa opcion pa tereno erfpacht, pero cu tabatin problema pa paga esaki. Ora cu e la pidi e opcion na mei, a resulta cu ora cu e mester a paga pa esaki despues, e no tabatin e placa. Riba insistencia di e fiscal e ora, Mansur a confirma cu e tabatin un problema familiar cu a resulta den problema financiero mesora tambe. Tabata te na November di e mesun aña cu Werleman a confronta Mansur cu e asunto cu e no a cumpli cu e condicion ey. E ora Mansur a admiti cu e ‘la haci magia’ y haya e placa. Placa cu e la haya di su famia (tata). “Laga mi aclarea e asunto di magia aki. Mi a yama mi famia pa pidi pa e placa” Mansur a clarifica despues. “Pues e magia cu bo tabata referi na dje, tabata e yamada na bo famia” e fiscal a bisa Mansur den un forma sarcastico, y Mansur a admiti.