Recordando Scorpio..

Scirbi pa Tito Laclé

Mi historia cu Ruben ‘Scorpio’ Garcia ta cuminsa, segun mi, for di añanan 70. Mi a gana festival Voz Hubenil na 1978, y Ruben tabata un di e MC nan e tempo ey. Eynan mi streya a nace, y Ruben kier a utilisa e momento ey pa lansa mi den radio.. Mi a bay Voz di Aruba cerca dje unda cu tabata papia di un programa di hubentud. Esey no a materialisa. Djey, destino a hibami pa Canal 90FM ora cu mi a cuminsa traha den e programa Double KC Musical Show di Key Club di Colegio Arubano. Eynan e propietario Albertico Arends a ‘descubri’ mi ‘talento’ di radio y tabata kier mi forma parti di su operacion. Mi no ta corda bon, pero somehow, mi a cuminsa traha algun ora merdia na canal 90. Y un dia, ruman di Ruben, Lhando a pidi mi pa reemplase, pa un of otro motibo durante e orario mas hot di radio (Ivo, bo tey?) . Eynan mi a cuminsa traha 2 pa 5, y e ora ey den añanan 80, mi tabata core bay cerca Ruben den e studio chikito di Voz di Aruba cada bez. 

THE PARTY ZONE

Despues, mi kier a cuminsa cu mi mesun programa, The Party Zone.. y claro, mi tabata kier pa e maestro cu e stem di oro, Ruben Garcia graba mi promo. Ey mi a siña mi prome les balioso. Mi promo tabata ‘invita’ e oyente pa scucha e programa. Ruben a bisami “NO champ. Ora cu bo invita, nan tin chens di bisa NO. Bo tin cu impone, bisa nan cu nan TIN un cita cu bo. No duna nan e opcion di escohe!” E ora e promo a bira.. ‘Hey, abo! Bo tin un cita cu Tito Lacle, den The Party Zone!”, envez di ‘mi kier a invitabo!’. Esey te awe, tabata e miho conseho cu Ruben a yega di duna mi. Te awe, mi ta usa e conseho ey pa TUR cos. Y esey tin mi unda mi ta awe. E la siña mi pa ta sigur di mi mes. 

MENUDO

Ora cu Ruben a trece e Menudo original Aruba, mi tabatin, segun mi, un programa na Radio Carina e tempo ey, di hubentud. Enfin, Ruben a invita mi pa bin entrevista e grupo exclusivamente den Concord hotel e tempo ey!. Masha scondi, pasobra ningun hende sa cua ta e camber di Menudo. Ruben a hibami ariba, y lagami den e camber cu e 5 integrantenan. Wow, mi prome entrevista internacional. 

E DUO RUBEN Y TITO DEN NOTICIA

Fast forward pa awor. Prome na Magic y despues Power. Ora cu Ruben tabata tras di control di radio, pa su programa, y e mester a duna pase pa mi pa un entrevista di ultimo ora di noticia, mi tabata sinti bon. Esaki pasobra Ruben semper tabata BON informa di noticia. E tabata sa tur cos. Con, mi no sa.. Pero e no tabata djis manda e pase pami, sino haci pregunta skerpi y alcaso.. Nos tabatin dialogo completo. Algo cu su subrino Melvin tambe tabatin hopi bon, ora cu e tabata mandami den aire pa un noticia. Enfin.. Fast Forward pa Power. Ora cu a desaroya e noticiero merdia na Aruba algun tempo atras, a bin cu e ‘sublime’ idea pa Ruben ta mi ‘sidekick’, durante noticia. Mi no a kere den e concepto, pasobra ami ta ‘homber serio!’ di noticia. Y Ruben ta den su mundo loco di animacion. Peroo… e la resulta un formula perfecto, cu te awe ta wordo papia di dje. E la bira e noticiero mas scucha, debi na e dinamismo di un noticiero cu tabata haya e noticia serio y veridico, y a la vez un angulo acerca di ‘e pueblo’ cu kier sa ‘algo mas’. Esun cu semper ta keda cu e pregunta ‘si, pero, con bin’. Y esey tabata tarea di Ruben. Nos tabatin un chimica incredible!. Ami NUNCA lo a kere esey, y mi ta contento cu mi tabata robez!.  

NOTICIACLA

Cu nacemento di Noticiacla, Ruben tabata e unico cu a transmiti e lansamento di e portal. E la kere den mi, semper, den e producto, y su respet pa mi como periodista tabata sinigual. Pesey, semper, ora cu tabata trata di Ruben, mi no tabata basila. Si Ruben tabata envolvi, bo por a conta cu mi. Ruben nunca ta bisa mi no, y ami nunca ta bise no. 

SU MALESA 

Algo prome cu su partida di e mundo aki, malo malo cu e tabata, den hospital, e tabata mandami voice notes TUR dia, di su update.. TUR dia pa un siman largo.. Riba su ultimo BDAY, e la manda mi su ultimo voice note. Nunca mi a pensa, cu e lo tabata e ultimo voice note di Ruben, pasobra manera e mes a bisa den e voice note: "Tito, diamars mi ta sali!" Destino tabata otro. Mi ta agradecido pa su amistad, pa su sosten, su apoyo incondicional, y mas cu tur, su sabiduria cu e la sa di comparti cumi durante mas di 40 aña. Ruben, Scorpio (nunca mi a yame Tio, pasobra pa mi , ta den temporada di Scorpio’s Disco nos a move), danki!, Dios tenebo den su gloria. Bo a toca HOPI hende, y HOPI lo sinti bo falta. Mi ta djis spera, cu tur lo sa di balora bo y duna bo e honor cu bo merece!. Champ, manera cu e tabata yamami, a bay. Te aworo!, Drumi dushi!. I will miss you, my dear friend!