Aruba su locutor di mas stima Ruben Garcia a bay sosega

ORANJESTAD – Despues cu for di ayera tabatin informacion circulando cu colega di prensa, locutor y animador Ruben “Scorpio” Garcia a bira hopi malo, y cu tabata teme lo peor, lamentablemente e noticia a drenta awe diahuebs merdia net prome cu 12'or y mei di merdia cu Ruben a bay sosega. Diadomingo ultimo ainda Ruben a cumpli 70 aña y tabatin tur intencion di celebra esaki manera ta su style, na grandi. Cu fayecimento di Ruben Garcia, Aruba ta perde su animador y locutor di mas grandi cu e la yega di conoce. E ta laga atras su querida casa Theresa ‘Treesje’ Garcia, yiunan Genevieve y Gillian, y su dos nietonan. 

MALESA

Ruben mas tempran e aña aki, ( juni 2022 ) a sufri un recaida formal cu a hink’e den hospital pa mas di 2 luna. Problema respiratorio, y despues di 2 siman hospitalisa, bringando pa su bida, a bin Sali afo cu e tabatin vasculitis. Aki a cuminsa trate pa esey, y finalmente pa 11 di augustus 2022, e la sali for di hospital, pero cu condicion y tratamento na cas, incluyendo cu boter di oxigeno. 

GRIEP

Siman pasa dialuna Ruben a haya un griep, y mester a keda interna atrobe den hospital, preparando pa haci un biopsis e siman aki y despues posiblemente bay cas. Lamentablemente cos no a bay segun plan y su condicion a cuminsa bay atras dramaticamente te cu e la sucumbi pa e malesa y bin fayece awe mainta.