Aruba ta subi WHO su lista di waf autorisa pa otorga Ship Sanitacion Certificate

ORANJESTAD -  Aruba ta subi World Health Organization (WHO) su lista di wafautorisa pa otorga Ship Sanitacion Certificate. Asina departamento di salud di Aruba DVG a informa dialuna mainta.  World Health Organization ta encarga pa duna conseho riba maneho pa control di enfermedadnan transmitibel internacionalmente. Esaki nan ta haci door di stipula medidanan di prevencion di cual International Health Regulations (IHR) ta uno. IHR ta un regulacionan international acorda pa 196 pais na mundo (incluso hulanda y pues Aruba) pa reenforsa e abilidad di paisnan pa detecta, analysis, raporta, y responde riba eventonan cu por forma un riesgo pa salud publico. Un di e capacidadnan bou di esaki ta ensera abilidad di paisnan pa por otorga “Ship Sanitation Certificate” pa evita cu transmision di malesa por tuma lugar den e caso aki riba boto, barco etc. 

Tawata den e siman di 3 pa 7 di oktober e aña aki cu tawata na Aruba un delegacion di Rijks Instituur Volksgezondheid & Milleu (RIVM) Hulanda pa a brinda e curso di ‘Ship Sanitation Certificate’ na e islanan di reino y Aruba. E curso aki tawata nesesario pa como Aruba nos por tin e autoridad cu tin conocimento nesesario di tur e exigencianan stipula conforme “International Health Regugulations (IHR)”, pa por otorga un “Ship Sanitation Certificate” na un barco cu mester esaki. Cada Ship Sanitation Certificate tin un validez di 6 luna y sin e documento aki valido un barco, boto etc por wordo nenga pa drenta un puerto, mirando cu e barco, boto por wordo considera como un fuente di contaminacion.

Den pasado Aruba tawata otorga “Derating Certificate”, pero na aña 2005 WHO a bin cu revision di e “International Sanitary Regulations” , e la wordo adapta pa “International Health Regulations (IHR)” unda cu e certificado di “Derating Certificate” a bira “Ship Sanitation Certificate”.  Di manera cu  Aruba a perde e autoridad pa haci inspeccion riba boto, barco etc y alabes pa otorga un prueba di sanidad. Un di exigencia ta cu Aruba mester a hasi adaptacion den ley y e inspectornan mester ta entrena ariba e tereno di e “International Health Regulations”.

Pero apenas despues di 3 siman cu personal di Dienst Warenkeuring en Hygiene di DVG a haci e curso aki y a obtene nan certificado, Aruba ta oficialmente riba e lista di WHO como un puerto mas unda boto, barco etc por acudi pa inspectornan di Departamento di Salud (DVG) - cu ta encarga pa implementa e medidanan sanitario y di higiena ariba e barco conforme e exigencianan stipula den “International Health Organization (IHR)” - lo por otorga e “Ship Sanitation Certificate”.