Segun Van Huffelen ta na ultimo momento Aruba a presenta resultado miho cu a evita aanwijzing

DEN HAAG - “Ta bon cu gobierno di Aruba na ultimo momento a presenta algun resultado cu ta mihor cu prome a spera y asina tene e deficit riba su presupuesto pa e aña aki bou di e limite palabra”, asina Secretario di Estado Alexanda van Huffelen di Relacionnan den Reino ta indica. “Cu esey a logra evita un instruccion pa 2022.”Asina e mandatario hulandes a laga sa diabierna mainta for di Hulanda den un comunicado. E la papia despues tambe cu algun periodista di Aruba durante un conferencia di prensa cu a sigui (lesa adhunto).

ARUBA NO TA HAYA AANWIJZING

Manera NoticiaCla a raporta anteriormente, Conseho di Minister di Reino a dicidi di no duna Aruba un instruccion (aanwijzing) pa aña 2022. Un mihor resultado inespera ta haci cu e deficit ta yega na 112,7 miyon Florin Arubano (AWG); 53 miyon euro. Cu esaki e deficit ta keda bou di e 131 miyon AWG palabra y pa e motibo ey un instruccion no ta necesario e aña aki. 

CAFT

E mihor resultado di Aruba a sali na cla despues di e conseho di Colegio di Supervision Financiero di Aruba (College Aruba Financieel Toezicht, CAft). Riba 13 di juli CAft a conseha Conseho di Minister di Reino pa duna Aruba un instruccion pa motibo cu gobierno di e pais no tabata tin su presupuesto balansa. CAft no a nota pasonan pa trece mas balance den gasto y entrada di e pais y segun CAft Aruba no ta haci suficiente pa drecha su situacion financiero pa termino largo.

Na nomber di e gabinete, e Secretario di Estado a manda un carta pa gobierno di Aruba pa trece gobierno na altura di e decision di Conseho di Minister di Reino. Den e carta ta menciona tambe reemplaso di e fiansanan di liquides existente pa fiansanan nobo, e asina yama refinanciamento. Esaki mester sosode otro aña. 

Den e carta ta menciona cu un presupuesto balansa, mara na un ehecucion confiabel y supervision financiero adecua pa medio di e ley di consenso Aruba financieel toezicht (RAft), ta esencial pa por drenta den dialogo cu otro tocante e topico di refinanciamento di debe.