Na Corsou, OM a pone recompensa pa tip di oro riba hit & run cu consecuencia fatal

WILLEMSTAD – Relashoná ku e dos kasonan di aksidente di tráfiko konsiderá komo “Hit & Run” ku a tuma lugá resientemente kaminda un siklista i tambe un peaton a pèrdè nan bida, Ministerio Públiko a pone 10 mil florin di rekompensa disponibel pa tep di oro den e dos kasonan, esta 5 mil florin pa kada kaso.  Polis huntu ku Ministerio Públiko ta realisando investigashon den e kasonan aki.

E promé kaso a tuma lugá den mardugá di djadumingu 2 di òktober 2022 riba Schottegatweg West. Riba e dia en kuestion den oranan di mardugá outoridatnan a topa e hòmber na bida yamá Maurice Orlando Pinnock heridá kantu di kaminda i no tabata duna señal di bida. E tabata move riba su baiskel pero a keda alkansá pa un vehíkulo.

E di di dos kaso a tuma lugá hustamente dos siman despues esta djaluna último dia 17 di òktober 2022 riba Gosieweg. Den e kaso aki ta trata di un peaton na bida yamá Rudsel Luciano Martis ku a keda alkansá pa un vehíkulo mirando ku a keda partinan di un vehíkulo atras. E víktima aki tambe a fayesé konsekuensia di e sla ku el a haña.

Den ámbos kaso e shofùr no a keda na e sitio pa por duna kara i atendé ku e aksidentenan.

Pa logra pone man mas lihé ku ta posibel riba e shofùrnan responsabel, ta hasi un súplika na komunidat pa koperá ku suministrashon di informashon den e kasonan aki.

Ministerio Públiko a pone un rekompensa di 5 mil florin disponibel, pa e informashon (tep di oro) ku por kondusí na e solushon di kada un víktima. Pa duna informashon riba e kasonan aki, por yama e number anónimo di polis 108.

Kuerpo Polisial i Ministerio Públiko ta konta riba yudansa di komunidat pa por solushoná e kaso aki mas pronto ku ta posibel. NOTA: E articulo ta scirbi den Papiamento fonetico di Corsou.