DOW purbando pa alivia San Miguel di inundacion di awa di Bubali Plas

ORANJESTAD - Bureau Rampenbestrijding Aruba conhuntamente cu DOW, Directie Volksgezondheid DVG ARUBA y Parke Nacional Arikok a wordo alerta di e jobidanan excesivo ultimamente. Consequencia di esaki, Bubali Plas a yega su capacidad di por carga awa y esaki ta afectando e bario di San Miguel, caminda e casnan den vecindario por yena cu awa extremadamente.

PLAN

BRA, DOW, DVG, y FPNA a prepara un plan pa mitiga e impacto riba hende y naturalesa mesora. Ayera nochi, DOW y Korps Politie Aruba a cera e caminda entre ex-House of Cheng y The Mill Resort, caminda a pone un pomp  pa pomp awa for di Bubali Plas pa bay den Salina di Palm Beach como un solucion inmediato y evita cu mester habri e sluis cu lo dirigi e awa pa laman.

POMP

Aworakinan e pomp tin 24 ora ta operando, y a manda mas o menos 17.000m3 di awa. Na e momentonan aki, e cantidad di awa cu ta wordo manda no ta suficiente.  Priorizando e salud y seguridad di e bario di San Miguel, a dicidi pa temporalmente habri e sluis pa por baha e exceso di awa mas liher y asina garantiza e seguridad di tanto hende como naturaleza. A dicidi cu ta bay habri e sluis entre 2 y 3 cm enbes di 15cm entre e oranan di 10:00pm y 3:00am pe proximo 8 dianan.  Esaki ta sigura cu solamente e parti ariba di e awa den Bubali Plas lo "sali" pa laman. E raiz di e waterhyacinths cu ta den e plas ta wanta e particulonan los y pa es motibo e cantidad di e concentracion di e awa den Bubali Plas a mengua y a wordo debilita.  DVG ta encarga pa monitoria e awa tur dia, pa asina sigura cu no tin ningun cambio den e calidad di awa cu ta drenta laman.

SOLUCION PRAGMATICO

Bao di e circumstancianan aki tur partidonan involvi kier sigura comunidad di Aruba cu e medida aki ta e unico solucion pragmatico pa preveni inundacion di e bario y garantiza e salud di e publico. Gobierno y tur instancianan concerni ta trahando conhuntamente pa un solucion structural den corto- y medio plazo pa por garantiza cu e situacion aki no ta ripiti .

AHUSTE

Den e proximo siman ahustenan technico lo tuma lugar pa optimaliza e fluho di awa pa Salina Druif. Solucion riba medio plazo ta ensera implementacion di un planta moderno, cu lo trata e awa residual conforme protocol di LBS. Tambe lo conecta "Westland Wetlands" cu lo duna apporte na e maneho di e masterplan pa maneha e awa di jobida na un nivel mas halto y incorpora plannan di mitigacion pa cambio climatico. Nos ta spera di por a informa comunidad di Aruba ariba e situacion akinan.