Chauffeur envolvi den accidente cu a laga 3 morto di trafico, a keda deteni!

ORANJESTAD – Awe mainta den careda di 11’or polis a detene e chauffeur S. Wilson envolvi den e accidente di siman pasa diadomingo cu a laga un saldo di 3 morto. Vocero di Ministerio Publico Ann Angela a confirma esaki pa noticiacla. “E sospecho ta doodslag cq dood door schuld’. 

MINISTER DI HUSTICIA 

Tabata awe mainta ainda cu e mandatario responsabel pa husticia, Rocco no kier a drenta detayes riba e caso di e chauffeur pero toch e la duna un comentario breve si. “Den tur caso ta tene cuenta cu ley y maneho. Entre otro si tin vluchtgevaar, si e persona por destrui evidencia etc” e mandatario a cuminsa na bisa di e caso. “Den e cuadro ey decicionnan ta wordo tuma entre Ministerio Publico Y Cuerpo Policial” Tjon a sigui bisa. “ Mi tin pleno confianza cu nan (KPA y OM:red)  lo percura pa e caso aki cana bon y cu Husticia lo cana manera mester ta” e mandatario a sigui bisa. Loke si e mandatario a bisa riba e caso directo, ta cu e la desmenti cu cierto cosnan ‘no a tuma lugar’ pa motibo di overtime. “ Manera ya ta conoci e asunto di overtime no ta conta pa ordediensten” Tjon a bisa, indicando cu esey ta inclui tambe cuerpo policial. 

E CASO

E caso ta cu siman pasa diadomingo (2 di October:red) un accidente feroz entre dos auto na Seroe Colorado a laga 3 persona morto y varios herido. E chauffeur cu lo a ocasiona e accidente a bira un sospechoso pa ‘dood door schuld’ door di Ministerio Publico, y cu e lo wordo atendi cu ne corectamente, cu ta ensera detencion y interogacion conforme ley. Pero e situacion di e chauffeur tabata di tal indole cu e tambe mester a keda hospitalisa prome. KPA a opta pa e persona recupera pa despues tuma e pasonan conforme ley, cu ta encera e detencion. E medio 24ora a raporta e siman aki cu e persona encuestion lo ta afo caba, na cas, envez di ta deteni. Pero awe mainta e persona a keda deteni.