Partido MEP kier pa Evelyn Wever Croes keda re-eligi atrobe como su lider

ORANJESTAD - Den reunion di Conseho di Partido di MEP dialuna ultimo, unanimamente a reconfirma e liderazgo di lider di partido y lo presenta esaki na e proximo Congreso di Partido. No a bisa si, si esaki ta nifica cu, contrario na loke e la yega di bisa e portal aki, cu e no lo postula su mes pa di tres biaha como prome minister si e oportunidad presenta. Den un programa di NoticiaCla LIVE e tempo ey, e la bisa cu e no ta kere e ta bay pa un di tres termino, pasobra mester laga espacio pa e generacion nobo. 

Na aña 2011, despues cu Nel Oduber a dicidi di bandona politica, partido MEP a tene un eleccion pa lider, y Congreso 2011 a eligi Evelyn Wever-Croes como Lider di MEP.

Na aña 2015 a re-eligi Evelyn Wever-Croes durante e Congreso 2015.

Despues di un tardansa ocasiona pa e pandemia di Covid-19, Partido MEP lo propone na su Congreso un biaha mas pa re- eligi Evelyn Wever-Croes como Lider di MEP pa e siguiente 4 añanan. 

Conseho di Partido a demostra confiansa den su Lider, cu aparte di ta e prome Prome Minister femenino di pais Aruba, tambe ta e votegetter di e ultimo eleccion.  Partido MEP a sigui bisa cu e ta sumamente orguyoso di su Lider cu a demostra cu e por a lidera partido y pais den bon tempo y den tempo dificil. 

Congreso 2022 lo tuma luga dia 30 di oktober 2022 durante un actividad na Cede di MEP