Diabierna dia 14 October pa seis or Na Drempel di fin di aña ta cuminsa

PALM BEACH - Esaki ta e siman principal, e siman pa duna inicio oficial di e temporada nobo di e programa tan stima y anticipa cual ta Na Drempel di fin di aña 2022.

Manera ta un tradicion di tur aña, tanto grandi como esun di mas chikito, ta en espera di e zonido di e oloshinan cu ta cana, pa duna inicio na e temporada cu ta trese mas Paz , Amor y Alegria den curason di e pueblo di Aruba. Un programa cu a cuminsa na aña 1988 caba y e aña aki ta cumpli 34 aña consecutivo den aire riba Radio. Durante e pandemia na aña 2020, su productor y presentador Erin Croes a sa di hiba e studio di e emisora MAGIC FM na su propio cas cu a haci cu e show por a sigui sin problema y duna e audiencia un motibo special pa keda cas y ta den sintonia. “Ta manera e programa tin su toke magico cu’ne, mi ta sigur cu ta e consistencia pa cual nos a dedica tanto aña na esaki ta un di e secretonan di e gran exito”, Erin Croes ta comenta.

“Ami ta drecha mi cas ora mi ta den sintonia cu Na Drempel”, asina e comentarionan ta ser duna. “Ami ta traha y prepara mi ayackanan, mi ham di pasco, pa famia y bisiña bin tuma”, “Mi stima e programa , e ta dunami un indicacion cu temporada di pasco a cuminsa”, “ Mi no por warda pa October yega pa nos sinta gosa di e programa den ambiente di famia”, “ e programa ta dunami u alegria den mi curason”, ta e comentario di mayoria di e audiencia, cual ta masha grandi, ta indica.

Cu seccion special manera “Arubanita” cu Addonsito Croes ken ta docente di geografia y geschiedenis na St Filomena College, e Storia pa Inspira, e famoso Santa Baskets cu ta reparti di un ser keri na e otro, Pregunta y Premionan combina cu tips y entrevista cu artista y invitadonan ta e formula cu a bira un exito pa e ultimo decadanan.

“Nos ta sumamente contento y honra pa e cariño y apoyo risibi e ultimo decadanan, pasobra ja ta bay 35 aña otro aña y mi ta sigur cu nos a sa di contribui grandemente na engrandece y stimula e temporada mas bunita, yena cu e bon sentimentonan di hermandad den nos comunidad. E idea ta pa semper nos contagia nos isla cu e spirito positivo di e temporada cu ta trece mas compasion, cordialidad y amor entre sernan humano y esaki ta algo realmente magico”, Erin Croes a comenta.